Bastapqy básekelerde ol amerıkalyq Danıel Kollınz (WTA-nyń №71 raketkasy) ben ıspanııalyq Krıstınoı Býchadan (№74) basym tústi. Alǵashqy oıynda otandasymyz biraz qınalsa, ekinshisinde qarsylasyn ońaı eńserdi. Jartylaı fınalda Rybakınanyń joly álemdik reıtıngte 15-orynda turǵan reseılik Lıýdmıla Samsonovamen qıysty. Alǵashqy setti bizdiń sportshy taza utqanymen, ekinshisinde jeńilis tapty. Esesine sheshýshi tusta shırek qımyldap, fınalǵa joldama aldy – 6:0, 4:6, 6:2. Bir aıta keterligi, buǵan deıin qos tennısshi ózara tórt márte kezdesip, bul básekelerdiń barlyǵy Samsonovanyń paıdasyna sheshilgen edi.
Bas júlde úshin Elena álemniń 14-raketkasy, reseılik Darııa Kasatkınamen kúsh synasty. 26 jastaǵy Tolıattıdiń týmasy WTA týrnırlerinde alty ret top jardy. Rolan Garrostyń jartylaı jáne Ýımbldonnyń shırek fınalynda oınady. Qazirgi kezde ol úzdikter tiziminde 14-satyǵa jaıǵasty. Túrli týrnırlerde tórt ret sheberlik baıqasqan tennısshiler arasyndaǵy esep ázirge teń. Bul joly Rybakına kortta erkin qımyldap, qarsylasyna adym ashtyrmady. Nátıjesinde, 6:1, 6:4 esebimen jeńiske jetken jerlesimiz bas júldemen qatar 142 myń dollardy qaltasyna basty. Bul – Elenanyń bıylǵy maýsymdaǵy WTA týrnırlerindegi ekinshi jeńisi! Qańtar aıynda ol Brısbendegi básekede aldyna jan salmaǵan edi.
Jarys aıaqtalǵan bette dúıim jurttyń aldynda sóz alǵan Elena Rybakına: «Ábý-Dabıdegi jarys barysynda Qazaqstannyń týyn kórgen saıyn erekshe shattandym. Jerlesterimniń qoldaýyn sezinip, ár kezdesý saıyn kortqa qushtarlanyp shyqtym. Árbir oıynda barymdy saldym. Árkez meniń tileýimdi tilep otyratyn ózimniń shynaıy jankúıerlerimdi qýantqym keldi. Parsy shyǵanaǵynda ol maqsatyma jettim. Fınaldyq saıysta aıaqtalǵan bette ár tusta jelbirep turǵan qazaqtyń kók baıraǵyn kózim shaldy. Soǵan súısine qaradym. Bul da meniń sporttyq ǵumyrymdaǵy qýanyshty, áserli sátterdiń biri», dep aǵynan jaryldy.
Jasy kelgen saıyn baby kemı bastaǵan Mıhaıl Kýkýshkın Nottıngemdegi «Chellendjer» týrnıriniń fınalyna shyǵa almady. Júlde qory nebári 75 myń eýro shamasyndaǵy qarapaıym ǵana jarystyń alǵashqy aınalymynda ol ulybrıtanııalyq Charlz Brým men belgııalyq Iorıs De Loreden aılasyn asyrdy. Kóp keshikpeı bolgarııalyq Dımıtar Kýzmanovty qapy qaldyrdy – 6:3, 6:3. Jartylaı fınalda jerlesimiz fransııalyq Matteo Martınoǵa 4:6, 6:7 esebimen ese jiberdi.
Taıaýda ǵana Qazaqstannyń azamattyǵyn alǵan Aleksandr Shevchenkonyń da (№56) joly bolmady. Júlde qory 801 335 eýrony quraǵan Marseldegi týrnırdiń tusaýkeser kezdesýinde ol fransııalyq Bendjamın Bonzıden (№126) basym túskenimen, ile-shala polshalyq Hýbert Hýrkachtan (№8) 1:6, 4:6 esebimen jeńildi. Sol sekildi Iýlııa Pýtınseva da (№69) senim údesinen shyǵa almady. Dohadaǵy dodanyń tusaýkeser kezdesýinde ol AQSh-tyń ókili Bernard Peradan (№86) aılasyn asyra almady – 6:7, 4:6.
