Sýretterdi túsirgen – Aqádil Rysmahan
Jańa nysannyń ashylý saltanatyna óńir basshysy Erbol Qarashókeev bastaǵan azamattar arnaıy qatysyp, Qumshaǵal turǵyn alaby halqynyń qýanyshyna ortaqtasyp, izgi tilegin arnady.
«Jergilikti halyqty buqaralyq sportqa tartýdyń mańyzy zor ekeni anyq. Memleket basshysy da bul máselege aıryqsha den qoıyp otyrǵany belgili. Sondyqtan da óńirde osy baǵyt boıynsha aýqymdy jumystar atqarylyp jatyr. Qumshaǵalda ashylǵan deneshynyqtyrý-saýyqtyrý kesheni – sol jumysymyzdyń aıqyn bir dáleli. Keshenge aǵylyp keletin jergilikti jastar arasynan Olımpıada oıyndary men Álem chempıonatynyń, qurlyqtyq dodalardyń jeńimpazdary shyǵatynyna senemin. Qumshaǵal turǵyndaryn jańa nysannyń ashylýymen shyn júrekten quttyqtaımyn», dedi E.Qarashókeev deneshynyqtyrý-saýyqtyrý kesheniniń ashylý saltanatynda sóılegen sózinde.
Is-sharaǵa arnaıy qatysqan eńbek ardageri Rahmanbek Ustaev qumshaǵaldyqtar atynan sóz sóılep, jańa keshenniń ashylý saltanatyna arnaıy qatysqan óńir basshysy E.Qarashókeevke rızashylyǵyn jetkizip, alǵys aıtty.
Keıingi jyldary óńirdiń sport salasyn órkendetý maqsatynda qazynadan qomaqty qarajat qarastyrylyp jatyr. Derekke júginsek, ótken jyly 14,2 mlrd teńge bólinipti. Jergilikti bıliktiń qoldaýyn sezingen jambyldyq sportshylar óz kezeginde aýyz toltyryp aıtarlyqtaı tabystarǵa qol jetkizip, jankúıerlerdi qýantyp jatyr. Máselen, taıaýda ǵana elorda tórinde ótken el chempıonatynda erkin kúres sheberleri kóńil kónshiterlikteı nátıje kórsetip, jalpykomandalyq esepti top jarǵan edi.
Astana qalasynda uıymdastyrylǵan el chempıonatynda 97 kg salmaq dárejesinde topqa túsken Álisher Erǵalı fınalda álem chempıony Rızabek Aıtmuhandy jeńip chempıon atansa, 70 kg salmaq dárejesinde beldesken Meıirjan Áshirov te jeńistiń bıik tuǵyrynan kórindi. Taǵy úsh balýan kúmis júldege qol jetkizse, bir sportshy qola medal ıegeri atandy.
«Qumshaǵal turǵyn alabynda boı kótergen deneshynyqtyrý-saýyqtyrý kesheni – turǵyndar kópten kútken qýanysh. Bul keshende jergilikti azamattarmen birge balalar men jasóspirimder de sportpen shuǵyldanyp, salamatty ómir saltyn ustanatyny anyq. Bir sózben aıtqanda, jańa keshen qumshaǵaldyqtardyń kásibı sportpen de, buqaralyq sportpen de aınalysýyna zor múmkindik týdyryp otyr», deıdi Olımpıada oıyndarynyń eki dúrkin júldegeri, dańqty dzıýdoshy Eldos Smetovtiń alǵashqy bapkeri Ahmet Jumaǵul.
Eki qabatty jańa sport nysanynda balalar men jasóspirimder deneshynyqtyrý klýby qurylǵanyn aıta ketken jón. Munda 7-17 jas aralyǵyndaǵy jergilikti jasóspirimder sporttyń segiz túrimen shuǵyldana alady.
Derekke sensek, byltyr óńir boıynsha 9 sport kesheni ashylǵan. Al osy jyldyń sońyna deıin 13 nysannyń qurylysy tolyqtaı aıaqtalyp, turǵyndardyń ıgiligi úshin paıdalanýǵa beriledi dep josparlanyp otyr. Qazirgi kezde 492 myńnan asa jambyldyq nemese óńir halqynyń 40,3 paıyzy buqaralyq sportqa tartylǵan.
Qalaı desek te, óńir sportyn damytý maqsatynda keıingi jyldary aıtarlyqtaı jumystar atqarylyp jatqany anyq. Bılik qoldaýyn sezingen jambyldyq sportshylar jaqsy nátıjelermen qýantady degen senim zor.
Jambyl oblysy
