Is-shara – byltyrǵy 21 qyrkúıektegi «S5+1» sammıtiniń Nıý-Iork deklarasııasynda kórinis tapqan Ortalyq Azııa jáne AQSh elderi memleketteri basshylary bastamalarynyń birin praktıkalyq iske asyrý jónindegi alǵashqy qadam.
Qazaqstan delegasııasy О́nerkásip jáne qurylys mınıstri Q.Sharlapaev, Syrtqy ister mınıstrliginiń ókilderi, onyń ishinde Qazaqstannyń AQSh-taǵy Elshisi E.Ashyqbaevtyń atynan usynyldy. Sóz sóıleý barysynda qazaqstandyq ókil Ortalyq Azııa óńiri men Qazaqstannyń synı mıneraldardy damytý jáne turaqty jetkizý tizbegin qurýǵa járdemdesý salasyndaǵy eleýli áleýetin atap ótti.
Otyrysqa AQSh Memlekettik hatshysynyń Ekonomıkalyq ósý, energetıka jáne qorshaǵan orta jónindegi orynbasary H.Fernandes tóraǵalyq etti. Is-sharanyń moderatory AQSh Memlekettik hatshysynyń Energetıkalyq resýrstar jónindegi kómekshisi Dj.Paıett boldy.
Alańnyń maqsaty – taza energetıkaǵa turaqty kóshýge jáne klımattyq ózgeristerge qarsy kúreske yqpal etetin mıneraldy shıkizatty jetkizýdiń mańyzdy tizbegin damytý jáne ilgeriletý.
Mańyzdy mıneraldar boıynsha «S5+1» dıalogi sheńberinde «Paıdaly qazbalar qaýipsizdigi salasyndaǵy seriktestik» jáne «Jahandyq ınfraqurylym men ınvestısııalar múddelerindegi seriktestik» bastamalary aıasynda yntymaqtastyq keleshegi atap ótildi. О́z kezeginde Ortalyq Azııa elderiniń ókilderi osy salaǵa amerıkalyq ınvestısııalardy tartý múmkindikterin zertteýge qyzyǵýshylyq bildirdi.
Sondaı-aq jumys sapary aıasynda Qazaqstan Respýblıkasynyń О́nerkásip jáne qurylys mınıstri aqpan aıynyń sońynda AQSh pen Kanadaǵa barady, onda mańyzdy paıdaly qazbalardy ıgerý salasyndaǵy kezdesýler jáne jyl saıynǵy «Prospectors & Developers Association of Canada» (PDAC) Halyqaralyq taý-ken forýmy ótedi. Bul alań paıdaly qazbalardy barlaý jáne óndirýmen aınalysatyn mamandardyń, kompanııalar men uıymdardyń eń úlken kezdesý orny bolyp sanalady.
