О́ner ıesiniń aıtýynsha, onyń qaltasynda sońǵy 30 teńgesi ǵana qalyp, ne isterin bilmeı júrgen kezderi de bolǵan.
- Almaty qalasynda Abaı kóshesiniń boıymen kele jatqan edim. Qaltamda 30 teńgem boldy, sol 30 teńgem túsip qalmasyn dep syrtynan ustap qoıamyn. Qaryn degen ashyp ketken. Eki báteńkemniń tabany jyrtyq, al ishindegi shulyq aıaq kıim jyrtyq bolǵan soń, mindetti túrde jyrtyq bolady ǵoı. Sóıtip jerdi tabıǵı terimmen basyp kele jatyrmyn, - dedi ánshi.
Almatyǵa kelmes buryn oǵan Shattyq degen qurdasy qalada turatyn quda balasynyń nómirin bergen.
- Habarlassań boldy, saǵan kómektesedi degen edi. Men ol jigitti Aqtaýǵa bir-eki ret kelgen kezinde kórgen edim, azdap tanımyn. Kún batyp, kesh bolyp qalǵan, Saryarqa bazarynan samsa alyp, endi ne isteımin dep jep kele jatyrmyn. Bir kezde aldymnan jańaǵy jigitke uqsaıtyn bir bala ushyrasa ketti. Qarap tursam, sol jigit. Ol oryssha sóıleıtin, ol Gadılbek dep, men Almat dep, ekeýmiz máre-sáre boldyq. Koreı serıaldaryndaǵydaı dese de bolady. Sodan meni úıine aparyp, ornalastyryp, kóp kómegi tıdi, - dedi Ǵadilbek Janaı.
Ol osyndaı sátter basynan kóp ótkenin jetkizdi. Baratyn jer tappaı, saıabaqtarǵa da qonǵan.
- Kafelerden bir kese shaı alyp, sol jerde tańdy atyratyn edik. Men muny jastarǵa keńes retinde aıtyp otyrmyn, jastardyń esinde bolsyn, bul bir qudaıdyń ósirem dep beretin synaǵy-sabaǵy. Qazir osyndaı sátti bastan keship júrseńizder, bolashaqta, jaqynda bıikti baǵyndyramyn dep oılańyzdar, kútińizder, - dedi ol.
