Polisia.kz saıtynyń habarlaýynsha, IIM arnaıy jasaǵy bul týrnırge osymen ekinshi ret qatysyp otyr. Bıyl jaýyngerlerimiz álemniń 41 elinen qatysqan 74 komandanyń ishinen 6-oryndy qanjyǵaǵa baılady.
Jarystyń barlyq kezeńi tartysty ótti. Arnaıy bólimshelerdiń qyzmetkerleri ártúrli taktıkalyq tapsyrmalardy oryndady. Atap aıtqanda, taktıkalyq daǵdylardy, ıntellektýaldy shoǵyrlanýdy jáne fızıkalyq tózimdilikti tekserýge baǵyttalǵan shabýyl jáne qutqarý operasııalaryn júrgizdi. Synǵa toly dodada tipti bir jaýyngerimiz aýyr jaraqat alyp qaldy. Alaıda jigitterimiz namysty qoldan bermeı, jarystyń barlyq kezeńinde batyldyq pen tabandylyq tanytty, birlik pen baýyrmaldyqtyń naǵyz úlgisin kórsetti.
Arnaıy jasaq alǵashqy úsh kezeńnen sátti ótip, júldeli 1 jáne 3-oryndardy ıelengen bolatyn. Biraq tórtinshi deńgeı olar úshin ońaı bolmady. Jaýyngerlerdiń biri tapsyrmany oryndap jatqanda aıaǵynan jaraqat aldy. Alaıda ol buǵan qaramastan jarysty toqtatpady. Ony áriptesteri jarty jolda qaldyrmaı, mejeli jerge deıin súıep alyp keldi.
Sonymen, komanda barlyq kezeńdi birge ótip, tolyq quramda márege jetti. Sheshýshi synda komanda múshesi aýystyrylyp, jaraqat alǵan jaýynger aýrýhanaǵa jetkizildi. Qazir jaǵdaıy turaqty, eshqandaı qaýip joq.
– Men aıaǵymdy «Munara oqıǵasy» jattyǵýynda syndyryp aldym. Biz úshinshi qabattan ekinshi qabatqa túsip, qońyraýdy soǵyp, jerge túsýimiz kerek edi. Ol jerge sekirgen kezde, toq soqqandaı sezimde boldym, kózderim qaraýytyp ketti. Biraq mende toqtaý týraly oı bolǵan joq. Ne bolsa da, márege jetýim kerek dep sheshtim. Jigitter men jerlesterim toqtaýsyz qoldaý kórsetti. Olarǵa sheksiz rızamyn, – dep oıymen bólisti jaýynger.
Aıta keteıik, «THE UAE SWAT Challenge» – kúsh qurylymdarynyń arnaıy kúshteri arasynda ótkiziletin beıresmı álem chempıonaty. Ony «Arnaıy jasaqtar olımpıadasy» dep te ataıdy. Bul jarystyń basty mindeti – arnaıy maqsattaǵy jasaqtardyń básekege qabilettiligi men tıimdiligin arttyrý.
