Muny biz ózge de ákimderge úlgi bolsyn degen nıette jazyp otyrmyz. Esterińizde bolsa, El Prezıdenti Qasym-Jomart Toqaev «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Joldaýynda «Halyq únine qulaq asatyn memleket» tujyrymdamasyn bekitken edi. Iаǵnı memlekettik qyzmetker halyqtyń tilek-aryzyn jerge tastamaı, máselesin sheshýge umtylýy shart. Soǵan oraı qala basshysy qyzmettik kóliginsiz, jalǵyz ózi el ishin qoǵamdyq kólikpen aralap, turǵyndarmen tildesti.
Qala ákimin birden tanyǵan jurtshylyq onyń bul bastamasyn qoldap, halyqpen birge qoǵamdyq kólikpen júrip qala ishin aralap júrgen eń alǵashqy ákim ekendigin aıtty.
«Ákimniń avtobýsqa otyrǵany jaqsy boldy. Keıbir avtobýstardy uzaq kútemiz, qala syrtyndaǵy saıajaılarǵa baratyn qoǵamdyq kólikter óte az. Odan keıin qalanyń ishki joly óte nashar. Ortalyq bazarda adam júretin joldarǵa turǵyndar kólikterin qoıyp tastaıdy. Osy máselelerdi qaraýyńyzǵa alsańyz», dedi qala turǵyny Gúldarııa Ánýarbek.
Ádettegideı qala ákimi turǵyndardyń jeke máselelerin kabınette emes, turǵyndarǵa toly avtobýsta tyńdap, keı máseleni jeke baqylaýyna alatyndyǵyn jetkizdi.
«Keıingi ýaqytta qoǵamdyq kólikte bolatyn keleńsiz jaıt jıilep ketkenin áleýmettik jeliden baıqap otyrmyn. Osy máselege qatysty halyqtyń pikirin tyńdap, turaqty túrde qalany qoǵamdyq kólikpen aralamaqpyn. Jurtshylyqtyń máselesin jiti kórýge múmkindik beredi eken», dedi E.Bázil.
Sonymen qatar qala basshysy kommýnaldyq bazarmen ortalyqta jaıǵasqan saýda nysandaryn da aralady. Aldaǵy ýaqytta bul úrdis ádetke aınalmaq. Turǵyndarmen tyǵyz qarym-qatynas ornatý úshin jáne qalanyń ishki máselesimen jiti tanysý úshin ózge de avtobýstarmen oblys ortalyǵyn aralaıdy.
Jetisý oblysy
