Jyl saıyn memlekettiń, El basshysynyń qoldaýymen Aýǵan soǵysynyń ardagerlerine qoldaý kórsetilip keledi. Naqty aıtqanda, bes otandasymyzǵa Keńes Odaǵynyń Batyry ataǵy berildi, 1 adam Halyq Qaharmany atanyp, eki azamat «Aıbyn» ordeniniń ıegeri atandy, júzdegen azamat burynǵy KSRO jáne Qazaqstan Respýblıkasynyń ordenderimen jáne medaldarymen marapattaldy.
Densaýlyq saqtaý mınıstrligi de óz tarapynan Aýǵan soǵysynyń shıelenisinde shıraǵan ardagerlerimizge barynsha qyzmet kórsetip otyr. Maýsym saıyn soǵys ardagerlerine arnalǵan respýblıkalyq klınıkalyq gospıtalinde Aýǵan ardagerleri de turaqty túrde sapaly em qabyldaıdy. Emhanada ardagerlerimizdiń jan saýlyǵy men tán saýlyǵyn saqtaýǵa barlyq jaǵdaı jasalǵan.
«Amanat» partııasynyń «Ardagerlerdi ardaqtaıyq» jobasy aıasynda jaqynda mınıstrlik pen gospıtal ujymynyń uıymdastyrýymen Aýǵan soǵysyna qatysqan jaýyngerlerdiń qurmetine oraı «Aýǵannyń asýynda ot keshkender» atty kesh ótti. Tarıhı taǵylymy mol is-sharada elimizdiń ár óńirinen kelgen ardagerler bas qosyp, ótken kúnniń estelikterine úńildi, táýelsizdik tartý etken beıbit kúnniń berekesine boı jylytty. Bar aımaqtan kelgen ardagerdiń basy birikken saltanatty jıyndy Ulttyq qaýipsizdik komıtetiniń Shekara akademııasy áskerı orkestri rýhty áýen, ásem sazben kómkerdi. Aýyr amanat arqalap, ómir men ólim qaıshylasqan qandy shaıqasqa qatysqan Marat Majıtov, Alık Atyqanov, Murat Abdýshýkýrov, Baıdáýlet Dárkenbaev, Almasbek Aıdarbaev, Bolat Saılan, Jumat Qunanbaı, Dúısen Maǵulumov, Marat Saıbekov, Baqyt Taqyrbasov, Altynbek Tanabaev, Valerıı Permınov, Naýryzbaı Aıdabosyn, Mahat Smaqov syndy ardagerlerge Alǵyshat jáne baǵaly syılyqtar tabystaldy.
Gospıtal basshysy Gaýhar Tazabekqyzy maıdangerlerdiń bıik bolmys, márt tulǵa, batyr beınesi jaıly aıta kelip: «Aýǵan soǵysy ardagerleriniń júrip ótken joly, eren eńbegi, kórsetken erligi – búgingi urpaq bilýi kerek tarıh betteriniń bir paraǵy. Bul tarıhı kúnniń mán-mańyzy tym tereńde jatyr. Sondyqtan da halyq úshin Aýǵan soǵysy ardagerleri – joǵary rýhtyń kórinisi. Ardagerlerin qadirlep, rýh jasampazdyǵyn jańǵyrtaıyq», degen izgi tilegin bildirdi.
Keıinnen jıylǵan qaýym men ardagerlerdiń qurmetine aq halattylar óz ónerin pash etti. Kópbeıindi ońaltý bóliminiń meıirbıkesi Aıdyn Sovet «Aýǵanstan» ánin shyrqasa, nevrologııa bóliminiń qyzmetkeri Mınıra Torokýlova «Aýǵanstan qasireti», terapııa bóliminiń aǵa meıirbıkesi Móldir Baltabaı «Án sal sarbaz», fızıoterapııa bóliminen Aıbek Qasymahyn naqyshyna keltire óleń oqyp, klınıka-dıagnostıkalyq bólim meıirbıkeleri «Alǵa, qazaq jigitteri» ánin shyrqady.
Sondaı-aq sazdy keshtiń saryny, taǵylymdy kezdesýdiń tálimine boılaǵan ardagerler gospıtal qyzmetkerleriniń sapaly qyzmetine saı berilgen marapatyn tabystady. Jyly lebiz bildirip, gospıtal ákimshiligi men ujymǵa alǵysyn jaýdyrdy. Aýqymdy is-shara jarqyn júzdesýge toly boldy. Keshte general maıor Marat Álimjanuly óziniń jasaǵyndaǵy sarbazy Oleg Ozerovti «kútpegen jerden» kezdestirip, erekshe sezimge bólengenin baıandady. Ardagerlerin ulyqtap qana qoımaı, qansha jyldan keıin bir ortada tabystyrǵan gospıtal ujymyna alǵys aıtty.
Kesh sońynda estelikter aıtylyp, uzaq ýaqytqa deıin ardagerler ózara qaýqyldasyp jatty. Sol kúni kópshilik qundy keshti ǵana qyzyqtap qoımady, ónerpazdardyń ystyq yqylasy, meımanasy tasyǵan ardagerler men izetti dárigerler qaýymynyń árbir áreketi erliktiń dańqy máńgi óshpeıtinin aıǵaqtap turdy.
Dastan QASTAI,
jýrnalıst
ALMATY
