Jas maman «Zańǵar ustaz» atty jobasyn bir aıda jasap shyǵarǵan. Aqyldy qosymsha barlyq pán boıynsha berilgen tapsyrmany oryndaýǵa kómektesedi. Artyqshylyǵy sol – ony táýliktiń kez kelgen ýaqytynda qoldanyp, vırtýaldy muǵalimge suraq qoıýǵa bolady. Ol sizdiń saýalyńyzǵa áp-sátte-aq jaýap beredi.
– Bul qosymsha – mekteptegi synyp menedjmentin qalyptastyrýdaǵy muǵalimniń vırtýaldy kómekshisi. Oqýshylardyń qoıǵan suraqtaryna aqyldy bot tolyqtaı jaýap beredi. Bilim alýshylarǵa tapsyrmalardy ýaqtyly eske salyp otyrady jáne olarmen keri baılanys jasaıdy. Sonyń arqasynda balalardyń matematıka sekildi kúrdeli pánge qyzyǵýshylyǵy artqanyn baıqadym, – dedi joba avtory.
Qazirgi ýaqytta bul qosymsha tekseristen ótip jatyr. Sol sebepti ázirshe tek 24 oqýshy synaq retinde qoldanyp júr. Oqý jylynyń sońyna deıin oń nátıje kórsetse, oblys mektepterine engizýge bolady. Jas maman ol úshin arnaıy semınar ótkizýge de daıyn.
– Biz oqýshylardyń suranystaryna jaýap bere alatyn pedagogterdiń jańa býyny paıda bolǵanyna qýanyshtymyz. Jasulannyń balalarǵa sıfrlyq saýattylyq turǵysynan úıreteri mol. Ol balalardyń ǵylymǵa, bilimge degen umtylysyn oıatty. Sonymen qatar qazirgi zaman azamatynyń qundylyqtaryn darytyp, ózimizdiń ulttyq biregeıligimizdi saqtaýǵa tyrysady,– deıdi áriptesi Saltanat Ahmetova.
Memleket basshysy Respýblıkalyq pedagogter sezinde: «Balalarymyz zamanǵa saı ozyq bilim alýy qajet. 2050 jylǵa qaraı qazirgi kásipterdiń jartysyna jýyǵyn sıfrlyq jáne tehnıkalyq júıeler almastyrady», degen bolatyn. Rasymen, qazir eńbek naryǵy óte jyldam ózgerip, kóptegen salaǵa jasandy ıntellekt enip jatyr. Bul úderis jyldan-jylǵa qarqyn ala beretini sózsiz. Sondyqtan azamattarymyz jańa zamanǵa qajetti daǵdylardy úırenýi kerek.
Bekzat QULShAR,
L.N.Gýmılev atyndaǵy EUÝ stýdenti
