Ábıbadan basqasy álsiz

Qazirgi kezde Qazaqstannyń burymdylary arasynda tabysty óner kórsetip júrgen 26 jastaǵy Ábıba Ábýjaqynova ǵana ekeni barshaǵa málim. О́zbekstanda dú­nıege kelgen qazaq qyzy osydan birer jyl buryn tarıhı otanyna qonys aýdardy. Alma­tydaǵy respýblıkalyq sport kolledjinde bilimin jetildirip, sheberligin shyńdady. Talaı tulpardyń tomaǵasyn sypyrǵan qara­ shańyraqta bilikti balýan, tanymal bapker Nurbol Súleı­menovtiń qol astynda jat­tyqty. Asa jeńil salmaqta baq synaǵan Ábıba birer jyl ataqty dzıýdoshy Otgonseseg Galbadrahtyń kóleńkesinde júrdi. Mońǵolııalyq legıoner úlken sporttan qol úzgennen keıin Ábýjaqynova 48 kg salmaq dá­rejesiniń tizginin qolyna myq­tap ustady.

Búgingi tańda Ábıbanyń baǵyn­dyrǵan belesi zor. 2021 jáne 2022 jyldary ol Azııa birinshiliginde kúmis medaldi ıelense, aldyńǵy jyly Tashkentte ótken álem chempıonatynda qola medaldi oljalady. Buǵan qosa Grand Slam men Gran Prix týrnırlerinde jeńis tuǵyryna kóterildi. Byltyr Azıa­dada kúmis alsa, bıyl Por­tý­galııadaǵy dúbirli dodada otan­dyq dzıýdoshylar arasynan jalǵyz ózi jeńis tuǵyryna kóterildi. Qazirgi kezde Qazaqstan qurama komandasy músheleri arasynda IJF reıtınginde eń jaqsy kórsetkish Ábıba Ábýjaqynovaǵa tıesili. Ol 7-oryndy ıelenip tur.

Kámıla Berliqashtyń da aıaq­alysy jaman emes. Asa aýyr salmaqta aıqasatyn 24 jastaǵy balýan keıingi eki-úsh jylda bir­qatar asa iri halyqaralyq týrnırde júldegerler qatarynan kórindi. Keıbir básekelerde jeńis tuǵyryna synyq súıem qalǵanda súrindi. Osylaısha, qajetti upaı­laryn qorjynǵa salǵan Ká­mıla búginde +78 kg salmaqta 15-orynda tur. Dál osy tuǵyrdan tó­men­­demese, Berliqashtyń Olım­pıa­daǵa baratyny anyq.

О́kinishke qaraı, ózge balýanda­rymyzdyń jaǵdaıy máz emes. IJF reıtıngindegi olar mynadaı oryndarǵa taban tiredi: Ǵalııa Tyn­baeva (60 kg) – 28-oryn, Arýna Jankeldına (78 kg) men Es­mıgúl Kýıýlova (63 kg) – 38-oryn, Aqerke Ramazanov (+78 kg) – 39-oryn, Nazgúl Maratova (+78 kg) – 44-oryn jáne Sevara Nyshanbaeva (57 kg) – 53-oryn. Iá, dál osyndaı ógizaıań júrispen joǵaryda esimderi atalǵan sportshylardyń Olımpııa oıyndaryna joldama alýy ekitalaı.

IJF reıtınginde Fransııa ózgelerden kósh ilgeri. Qazirgi kez­de olardyń 12 sportshysy TOP-10-dyqqa enip otyr. Ekinshi orynda – Japonııa. Kúnshyǵys eliniń 8 qyzy – úzdikter tiziminde. Árıne, oǵan esh tańdanýǵa bolmaıdy. О́ıtkeni dál osy memlekettiń ókilderi Olımpııa oıyndary men álem chempıonattarynda oljaǵa molynan kenelip júr. 2021 jyly Tokıodaǵy dodada Kúnshyǵys eliniń qyzdary 4 altyn, 1 kúmis jáne 1 qola medaldi oljalasa, 2023 jyly Dohadaǵy álem chempıonatynda dál sondaı nátıje kórsetti. Qart qurlyqtyń ókilderi tórtjyldyqtyń basty dodasyn 1 altyn, 3 kúmis jáne 1 qolamen qorytyndylasa, Qatardyń astanasynda dál sol kórsetkishti aına-qatesiz qaıtalady.

Úzdik úshtikti Izraıl túıin­dep tur. Joǵarydaǵy reıtıngte olardyń 5 burymdysy bar. Tórtinshi satyǵa 4 dzıýdoshysyna senim artqan Germanııa jaıǵasty. Sondaı-aq Italııa, Kosovo, Por­týgalııa, Kanada, Brazılııa, Qy­taıdyń – 3, Ispanııa, Uly­brı­tanııa, Majarstan, Ońtústik Koreıa, Aýstralııa, Nıderland, Hor­vatııanyń – 2, Serbııa, Qa­zaqstan, Mońǵolııa, О́zbekstan, Grýzııa, Polsha, Grekııa, Aýstrııa jáne Túrkııanyń 1 balýany úzdik ondyqtyń qatarynda.

Kóshbasshylarǵa keler bolsaq, Kanadanyń eki burymdysy aldyna jan salar emes. Olar – Krıstııa Degýchchı (57 kg) men Katrın Boshmen-Pınar (63 kg). Japonııada týyp-ósip, keıinnen Úıeńki japyraqtar eline qonys aýdarǵan 28 jastaǵy Degýchchı – álemniń eki jáne Panamerıka chempıonatynyń úsh dúrkin chempıony. Monrealda dúnıege kelgen 29 jastaǵy Boshmen-Pınar – Olımpııa oıyndarynyń qola, álem chempıonatynyń kúmis júldegeri. Asa jeńil salmaqta 22 jastaǵy Italııanyń arýy Assýnta Skýtto eshkimge jetkizbeı keledi. Ábıba Ábýjaqynovanyń basty qarsylastarynyń biri dúnıe­júzilik dodada eki ret úshinshi oryndy ıelendi. Shaǵyn ǵana Kosovo elinen shyqqan 28 jas­taǵy Dıstrııa Krasnıchı 52 kg salmaqta dara tur. Ol – Tokıo Olımpıadasynyń jeńimpazy, álem chempıonatynyń eki dúrkin qola júldegeri, Eýropa chempıony jáne qurlyqtyq jarysta tórt márte jeńis tuǵyryna kóterildi.

Nıderlandtyq Sanne Van Deık 70 kg salmaq dárejesiniń tizginin qolynda berik ustap tur. 28 jastaǵy Qyzǵaldaqtar eliniń ókili Olımpııa oıyndarynda bir márte, álemdik dodada tórt ret qola medaldi moınynda jarqyratty. Eýropa birin­shiliginde bes ret (2 altyn, 2 kúmis, 1 qola) olja salyp, Eýropa oıyndarynyń fınalynda kúresti. 78 kg salmaqta In­bar Lanır aǵaryp alda keledi. 23 jastaǵy Izraıl dzıýdoshysy Tokıodaǵy oıyndardyń ko­mandalyq sa­ıy­synda úshinshi oryn alsa, byltyrǵy álem chempıo­natynda bas júldeni oljalady. Asa aýyr salmaqta fransııalyq Romana Dıkkonyń dáýiri júrip tur. 24 jastaǵy qara násildi balýan Tokıonyń jekelegen saıysynda qola alsa, komandalyq básekede altynnan alqa taqty. Álem chem­pıonatynyń aqtyq synynda eki márte aıqasyp, bir altyn men kúmisti qorjynyna saldy. Tórt birdeı qurlyq birinshiliginde qar­sylas shydatqan joq.