Prezıdent aýyl sharýashylyǵy salasyn damytýǵa eki ese qarjy bólý kerek dedi. Memleket aýyl sharýashylyǵyn eshqashan qoldaýsyz qaldyrǵan emes. Biraq Memleket basshysynyń keıingi jyldary úrdiske aınalyp bara jatqan qýańshylyq pen qymbatshylyqty eskere otyryp qabyldaǵan oń sheshimi sharýalardyń eńsesin kóterip tastaǵany shyndyq.
О́tken jyldyń aýyrtpalyǵyna qaramastan, bıyl óńir sharýashylyqtaryna túgel jetetin tuqym bar. Sharýalardyń bári aldaǵy kóktemde qalaı bolsa da dán sebýge daıyn otyr. Aýyl adamdary tózimdi, shydamdy, tehnıkasyn balǵamen de jóndep júre beredi, bári sheber. Eń bastysy, bıyl sebiletin tuqymnyń sapasyn aı saıyn tekserip otyrý kerek. Sapasyz bıdaıdy tuqymǵa jibermegen durys. Tuqym durys bolsa, kúz berekeli bolady.
Sýbsıdııa erejesi de jyl saıyn ózgeredi. Sharýalar sharshady. Osydan 10 jyl buryn agrobank ashý kerek degendi aıtyp edik, ol áli joq. «Damý», «Agrarlyq nesıe korporasııasy» sekildi tolyp jatqan neshe túrli qarjy ınstıtýttarynyń basyn biriktirip, bir bank ashsa, odan artyq eshteńe kerek emes.
Memleket basshysynyń aýylsharýashylyq óniminiń túsimin kóterý týraly oıy kóptiń kóńilinen shyqty. Osy oraıda aıtarym, ol úshin tyńaıtqysh máselesin sheshýdi myqtap qolǵa alý kerek. Tyńaıtqyshty arzandatyp, shaǵyn sharýalardyń da qoly jetetindeı etetin amaldardy qarastyrǵan jón. О́nimdi tyńaıtqysh kóteredi. Mysaly, Batys elderi tyńaıtqyshtyń arqasynda joǵary ónimge qol jetkizip jatyr. Aýyl sharýashylyǵy mınıstrligi men jergilikti atqarýshy bılik osy máselege nazar aýdarǵany jón.
Kózimizdi ashqaly aýyl sharýashylyǵy salasynda eńbek etip keldik. Sondyqtan aýyldy kórkeıtý úshin, eń aldymen, ınfraqurylymdy jaqsartý kerek. Keıingi jyldary aýyl-aýylǵa aýyzsý qubyry tartylyp, joldar salynyp, qyrýar sharýa atqarylyp jatyr. Alaıda aýylǵa gaz kelmeı, jaǵdaı turaqtalmaıdy, adamdar kóshe beredi. Qandaı jaǵdaı jasasaq ta kete beredi. Osy máseleniń de basshylardyń qaperinde júrgeni durys.
Saıran BUQANOV,
Qazaqstannyń Eńbek Eri
Qostanaı oblysy,
Meńdiqara aýdany,
Qarqyn aýyly
