Taraptar jańa óndiris nysandaryn iske qosýdy, taýarlardy, jumystar men qyzmetterdi satyp alýdaǵy jergilikti qamtý úlesin ulǵaıtýdy, munaı-gaz salasy men munaı hımııasyn damytýdyń ózekti máselelerin, sondaı-aq Qazaqstanda áleýmettik jobalardy iske asyrý barysyn talqylady.
Premer-mınıstr Memleket basshysy Qasym-Jomart Toqaevtyń tapsyrmasymen respýblıkada aýqymdy ekonomıkalyq reformalar júrgizilip jatqanyn aıtty. Olar ishki jalpy ónimniń jyl saıyn 6%-ǵa jáne odan da joǵary ósimin qamtamasyz etýge tıis.
«Úkimet ınvestorlarǵa ınvestısııalyq jobalardy damytý úshin barynsha qolaıly jaǵdaılar jasaıdy jáne qajetti qoldaý kórsetedi. О́z kezeginde biz seriktesterimizden jergilikti áleýetti barynsha paıdalanýdy, tehnologııalar transfertin, shıkizatty tereń óńdeýdi kózdeıtin birlesken josparlardy ýaqtyly iske asyrý boıynsha belsendi is-qımyldardy kútemiz», dedi Oljas Bektenov.
Premer-mınıstr Teńiz ken ornynda saǵalyq qysymdy basqarý jáne bolashaq keńeıtý jobalarynyń sáıkesinshe 2025 jyldyń birinshi jartyjyldyǵynda jáne 2024 jyldyń birinshi jartyjyldyǵynda aıaqtalýyn qamtamasyz etý kerektigin aıtty.
Sonymen qatar Premer-mınıstr Úkimet Qarashyǵanaq ken ornyn ıgerýge úlken mán berip otyrǵanyn atap ótti. Bul rette munaı men kondensat óndirýdi jylyna eń kemi 11 mln tonna deńgeıinde ustap turý – negizgi basymdyq.
«Qarashyǵanaqta qýaty jylyna 4 mlrd tekshe metrdi quraıtyn gaz óńdeý zaýytyn salý jobasyn iske asyrý týraly tujyrymdamalyq sheshim ken ornynyń bolashaq damýy úshin mańyzdy ekenin atap ótkim keledi», dedi Oljas Bektenov.
Sonymen qatar Premer-mınıstr ekonomıkalyq saıasattyń basymdyqtarynyń biri jergilikti qamtýdy damytý ekenine nazar aýdardy.
«Operatorlardyń qajettilikteri úshin ónim shyǵarýǵa múddeli jergilikti óndirýshilermen tyǵyz qarym-qatynas qajet. Bul rette eger elde qajetti taýarlar nemese jabdyqtar óndirilmese, onda biz osy óndiristerdi aldaǵy 2-3 jylda Qazaqstan aýmaǵynda lokalızasııalaý jónindegi naqty josparlardy kórgimiz keledi. Sondyqtan osy baǵyttaǵy jumysty qaıta qaraýdy ótinemin», dedi Úkimet basshysy.
О́z kezeginde Derek Magness «Shevron» kompanııasynyń Qazaqstanmen barlyq múddeli baǵyt boıynsha yntymaqtastyqty nyǵaıtýǵa ázir ekenin rastady.
«Biz birge jumys istep, aradaǵy seriktestikti damytýǵa múddelimiz. «Shevron» Qazaqstannyń ekonomıkasyn damytý úshin jumsalyp jatqan kúsh-jigerdi qoldaıdy. Búginde ınvestısııalar men jańa jobalar úshin jaqsy jaǵdaılar jasalyp jatyr. О́zara seriktestikke negizdelgen bolashaqtaǵy damý múmkindikterin kórip otyrmyz», dedi ol.
