Aldymen Erlan Qoshanov Memleket basshysy Qasym-Jomart Toqaevtyń konferensııaǵa qatysýshylarǵa arnalǵan quttyqtaýyn oqyp berdi.
– Berdibek Máshbekuly – Táýelsiz Qazaqstannyń qalyptasýyna jáne damýyna ólsheýsiz úles qosqan kórnekti memleket jáne qoǵam qaıratkeri. Ol ár jyldary joǵary laýazymdy qyzmetterdi abyroımen atqaryp, elimizdiń ósip-órkendeýine zor eńbek sińirdi. Birqatar óńirge jáne memlekettik organdarǵa jetekshilik etip, parasatty, isker ári bilikti basshy retinde tanyldy. Halyqtyń erekshe syı-qurmetine bólendi. Qaıratker tulǵanyń adamı qasıetteri, kásibı biliktiligi jáne adal qyzmeti – jas memlekettik qyzmetshilerge árdaıym úlgi-ónege, – delingen Prezıdent hatynda.
Jıynda Premer-mınıstrdiń orynbasary T. Dúısenova, Parlament Senaty tóraǵasynyń orynbasary J.Asanov, Prezıdenttiń ǵylym jáne ınnovasııalar máseleleri jónindegi keńesshisi K.Zakarıa, Shyǵys Qazaqstan oblysynyń ákimi E.Kósherbaev, Qazaqstannyń Eńbek Eri Q.Baımenova jáne basqa da memleket, qoǵam qaıratkerleri sóz sóılep, Berdibek Máshbekuly týraly júrekjardy estelikterin aıtty.
Konferensııada memleket jáne qoǵam qaıratkeri jaıly kitaptyń tusaýy kesilip, taǵylymdy ómir joly týraly arnaıy túsirilgen fılm kórsetildi.
