Aldymen burynǵy Qorǵanys mınıstri, general-polkovnık Sáken Jasuzaqov bastaǵan Qarýly kúshter ardagerleri Aýǵan soǵysynda opat bolǵan qarýlas joldastaryn bir mınýt únsizdikpen eske alyp, rýhtaryna taǵzym etti.
Internasıonalıst-jaýyngerlerdiń sózimen aıtqanda, «ózenniń arǵy betinen» oralmaǵan otandasymyz az emes. Resmı málimetke súıensek, Gındýkýsh óńirine elimizden shamamen 20 myńnan asa adam attanyp, myńǵa jýyǵy (920–950-diń aralyǵynda) elge myrysh tabytpen oraldy. 20-ǵa jýyq soldattyń taǵdyry áli kúnge deıin beımálim. 2 myńǵa tarta adam aýyr jaraqat aldy. Kim bilsin, eger de áskerı medısına qyzmetkerleri tabandylyq tanytyp, ómir men ólimniń arasynda júrgen jaýyngerlerdiń janyna arasha túspegende, bul san budan da kóp bolar ma edi? Sol sebepti de 35 jyldyqqa arnalǵan ıgilikti keshtiń Astana medısına ýnıversıtetinde ótýi zańdylyq.
Ataqty «Qara maıor» Borıs Kerimbaevtyń senimdi serigi bolǵan bilikti qolbasshy Sáken Ádilhanulynyń aıtýynsha, kez kelgen qarýly qaqtyǵysta «altyn saǵat» qaǵıdasynyń mańyzdylyǵy arta túsedi. Nege deseńiz, jan alysyp, jan berisken aıqasta aýyr jaraqattanǵan adamǵa alǵashqy saǵattarda shuǵyl kómek kórsetilmese, onyń ómirin saqtap qalý qıynǵa soǵady. Sondyqtan da tar jol taıǵaq keshken ardagerler beıbit ómir men qarýly janjal jaǵdaıynda óz mindetterin qaltqysyz atqaratyn izgilikti mamandyqtyń bolashaq ókilderine sáttilik tiledi.
«Soǵystyń qasireti qashanda aýyr. Kez kelgen qarýly qaqtyǵystyń saldary uzaq ýaqytqa sozylatynyn esten shyǵarmaǵan jón. Oǵan álemde bolyp jatqan jaǵdaılar dálel. Osy oraıda medısına qyzmetkerlerine aıtar alǵysymyz sheksiz. Olar qarsha boraǵan oqqa da, zeńbirek snarıadtaryna da qaramaı, qanshama adamnyń ómirin ólimnen qutqarǵanyn óz kózimizben kórdik. Sizder keleshekte dáriger atanasyzdar. Sol sebepti osy abyroıly mamandyqtyń týyn bıik ustaýǵa tıis ekenderińizdi umytpańyzdar. Bul keshti uıymdastyrǵan ýnıversıtet basshylyǵyna alǵys aıtamyz», dedi S.Jasuzaqov.
Sondaı-aq taǵylymdy kezdesýde medısınalyq qyzmettiń otstavkadaǵy polkovnıgi Asylhan О́teevtiń «Na ostrıe skalpelıa» kitaby kópshilikke tanystyryldy. Ol – Aýǵan jerinde talaı keńes jaýyngeri men jergilikti halyqty ólimnen saqtap qalǵan áskerı-hırýrgtiń biri de biregeıi. О́z eńbeginde bilikti maman áskerı medısınanyń qyr-syryna jan-jaqty toqtalǵan. Ásirese B.Kerimbaev basqarǵan 177-arnaıy jasaqtyń áskerı hırýrgi retinde nebir jaralyny kórip, olardy qalaı emdegenin baıandaǵan. Onyń ishinde jarylys kezinde aıaq-qolynan aıyrylǵan jaýyngerlerge qatysty jantúrshigerlik oqıǵalardy keltirgen.
«Birde aýǵanstandyq azamattyń qolynda granata jarylyp, saýsaqtary julynyp túsedi. Ony bizge dereý jetkizip, shuǵyl operasııa jasadyq. Operasııa oıdaǵydaı ótti. Aýǵandyqtardyń aǵzalary myqty bolady. Jaraqattary tez jazylyp ketedi. Bir aptadan keıin álgi azamat nemeresin ertip, bizge rahmetin aıtyp, qolyndaǵy qapshyqty ustatty. Qıyn sátte qolushyn sozǵanymyz úshin rızashylyǵyn osylaısha bildirmek eken. Qapshyqty ashsaq, ishi tolǵan anasha shóbi. Sol arada sanıtarlyq bólim bul «syılyqty» otqa jaǵyp jiberdi», degen A.О́teev beınebaılanys arqyly qyzyqty estelikterimen bólisti.
Bul keshke otstavkadaǵy general-maıor Mýslım Daıyrov, maıdanger jazýshy, otstavkadaǵy polkovnık Amangeldi Jantasov syndy Aýǵan jerinde ot keshken ardagerler men olardyń janyna arasha túsken áskerı medısınanyń maıtalmandary qatysqanyn aıta ketken oryndy. Qadirli qonaqtarǵa ýnıversıtet prorektory Vıtalıı Koıkov oqý ornynyń basshylyǵy atynan alǵyshat tabystady. Kesh sońy patrıottyq ánderge ulasyp, elordanyń daryndy oqýshylary shyǵarmashylyq qoıylymmen jınalǵandardy tánti etti.
