Jastardy qoldaýdy maqsat etken joba elimizdegi 20 aımaqty qamtıdy. Grant berý básekesinde basymdyq NEET sanatyndaǵy, ıaǵnı, ekonomıkalyq, áleýmettik nemese saıası faktorlarǵa baılanysty jumys istemeıtin, oqymaıtyn jastarǵa beriledi. Jobanyń egjeı-tegjeıin ortalyq kommýnıkasııalar qyzmetinde ótken brıfıngte Mádenıet jáne aqparat mınıstrligi Jastar jáne otbasy isteri komıtetiniń tóraǵasy Qaırat Qambarov túsindirip berdi.
«2022 jyldan beri jastardy jergilikti qoǵamdastyq qyzmetine qaıta tartý maqsatynda «Zhas project» granttyq baǵdarlamasy iske asyrylyp jatyr. Joba ómirlik mańyzdy daǵdylardy damytýǵa jáne qoǵam ómirine qatysýǵa, jeke tulǵa men áleýmettik ınstıtýttar arasynda senim ornatýǵa, áleýmettik jobalardyń turaqty ekonomıkalyq modelin qurýǵa baǵyttalǵan. Áleýmettik mańyzy bar bıznes-jobalardy oqytý men iske asyrý arqyly NEET sanatyndaǵy jastar oń jáne nátıjeli qyzmetke tartýdyń biregeı tájirıbesin alady», dedi Qaırat Qambarov.
Grantty ıelengennen keıingi basty talap - jobany 4 aıda júzege asyrý. Tájirıbesi tolyspaǵan jastardyń qanatqaqty jobalary jemisti bolý úshin ár óńirde qoldaý ortalyǵy jumys isteıdi. Ortalyqqa júgingen jas kásipker kókeıindegi áleýmettik, ekonomıkalyq, quqyqtyq saýaldaryna kásibı mamandardan jaýap, keńes ala alady.
Qyzyǵýshylyq tanytqandar joba talaptarymen Azamattyq bastamalardy qoldaý ortalyǵynyń cisc.kz resmı saıty men arnaıy «Zhas project» paraqshasynda tolyq tanysýyna múmkindik bar.
Al úzdik jobalar jeli arqyly anyqtalyp, osy jyldyń qarasha aıynda marapattaý rásimi uıymdastyrylady.
