«Aıqaı» – rejısser Kenjebek Shaıqaqovtyń ekinshi tolyqmetrajdy jumysy, al Ulttyq kınony qoldaý memlekettik ortalyǵynyń qoldaýymen túsirgen alǵashqy fılmi. Keıipkerlerin názik ıýmormen saraptaıtyn rejısserdiń sýretkerlik qoltańbasy aıqyn. О́tken jyly Ońtústik Koreıada ótken áıgili Pýsan kınofestıvaliniń A Window on Asian Cinema baǵdarlamasy aıasynda kórsetilgen fılm endi kári qurlyq kórermenderin tánti etti.
– Halyqaralyq kınofestıvalderde fılmderimizge degen suranys joǵary ekenin kórip otyrmyz. Álemdegi eń iri kınofestıvalderde top jaryp júrgen «Aıqaı» kartınasy – osynyń dáleli. Jalpy, kınoındýstrııa ókilderi jáne bizdiń ortalyq jumysty bir júıege qoıyp, ár fılm óz maqsatyn aıqyndaýǵa tıis. Bizge fılmderimizdiń sórelerde shań basyp jatqany emes, olardyń prokatqa shyǵýy, festıvaldarǵa qatysyp, jetistikterge jetkeni mańyzdy, – dep atap ótti «Ulttyq kınony qoldaý memlekettik ortalyǵy» KeAQ basqarma tóraǵasy Qurmanbek Jumaǵalı.
«Aıqaıda» ıadrolyq synaqtardan zardap shekken Semeı polıgony qurbandarynyń taǵdyry baıandalady. Eki aıaqsyz týǵan bas keıipkerdiń ómiri arqyly ıadrolyq jarylys qurbandarynyń qasiretti taǵdyry, sonymen qatar anasynan aıyrylǵan balanyń ákesine janashyrlyǵyn, qamqorlyq jasaýǵa degen talpynysy boıamasyz sýretteledi.
Kórkem týyndynyń túsirilimi Abaı oblysynyń Aıagóz aýdany, Shyńǵoja aýylynda ótti. Basty rólderde oınaǵan Orynbek Shaımaǵanbetov, Arnur Akram, Erbolat Álqoja, Beınur Baımuhambetov, Erlan Malaev, Aıbek Imanqulov, Aıǵanym Nursultan syndy akterler jumysy shynaıylyǵy hám beıne saraptaýdaǵy tereńdigimen daralandy.
