Etnosport konfederasııasynyń resmı múshesi boldyq

Forýmnyń ashylýynda sóz sóı­legen qaýymdastyq basshysy Islambek Saljanov Memleket basshysy Qasym-Jomart Kemeluly Toqaev Qazaqstanda ulttyq sportty júıeli damytýǵa erek­she nazar aýdaratynyn atap ótti. Ult­tyq sportpen aınalysatyn otandasta­rymyzdyń sany jyl sanap artyp keledi.

«Qazirgi tańda qaýymdastyqqa kiretin respýblıkalyq federasııalardyń jartysy halyqaralyq mártebe aldy. Keıbiri burynnan bar halyqaralyq uıymdardyń quramyna endi. Olardyń qatarynda aýdaryspaq, kókpar, qusbegilik, jamby atý, toǵyzqumalaq federasııalary bar. Bul Qazaqstanda ulttyq sport túrleri damýdyń jańa deńgeıine qadam basyp, kún ótken saıyn tanymal bolyp kele jatqanyn aıǵaqtaıdy», dedi Islambek Saljanov.

Forým barysynda Ulttyq sport qaýymdastyǵy etnosportty damytýǵa qatysty barlyq reglament pen rásim­derdiń halyqaralyq standarttarǵa saı bolýy úshin birqatar usynys aıtyldy. Olardyń qatarynda Dúnıejúzilik kóshpeliler oıyndarynyń negizgi sporttyq baǵdarlamasyn birizdendirý, halyqaralyq jarystardyń biryńǵaı kúntizbelik josparyn jasaý, Búkilálemdik etnosport konfederasııasymen birlesip aldaǵy 5-shi Dúnıejúzilik kóshpeliler oıyndarynda tóreshilik etý sapasyn arttyrý úshin arnaıy kýrstar uıymdastyrý jáne t.b. bar.

Etnosport salasyndaǵy ynty­maq­tastyqty nyǵaıtý maqsa­tynda Búkil­álemdik etnosport konfedera­sııasynyń prezıdenti Nedjmettın Bılal Erdoǵan Qazaqstan Respýblıkasy Ulttyq sport qaýymdastyǵynyń prezıdenti Islambek Saljanovqa resmı múshelik týraly sertıfıkatty tabys etip, etnosportty odan ári jahandyq deńgeıde damytýǵa jáne biriktirýge sózsiz serpin beretin aldaǵy 5-shi Dúnıejúzilik kóshpeliler oıyndaryn ótkizýde sáttilik tiledi.

Sondaı-aq forým barysynda Búkil­álemdik etnosport konfederasııasy men dástúrli sport túrleriniń ulttyq qa­ýymdastyqtary arasynda ózara tú­sinistik týraly memorandýmǵa qol qoıyldy. Onyń maqsaty – halyqaralyq ja­rystardy ótkizý kezinde jahandyq etalon retinde qyzmet etetin dástúrli sport túrleri men oı­yndary úshin konfederasııanyń biryń­ǵaı erejelerin ázirleý.

Álemniń 60-tan asa elinen kelgen halyqaralyq qatysýshylar úshin al­daǵy 5-shi Dúnıejúzilik kóshpeliler oıyn­darynyń baǵdarlamasy tanystyryldy.

Forým sońynda dástúrli sport sala­syndaǵy 5-shi halyqaralyq syılyq tabys etildi. Atalǵan syılyqty elimiz­den akademııalyq sanatta – Ál-Farabı atyndaǵy QazUÝ Dene tárbıesi jáne sport kafedrasynyń professory Elemes Álimhanov alsa, sport sanatynda – qazaq kúresinen sportshy Zarına Sarıpova marapattaldy.