Mádenıet jáne aqparat mınıstrligi Qoljazbalar jáne sırek kitaptar ulttyq ortalyǵy men Túrikmenstannyń Qazaqstandaǵy elshiliginiń uıymdastyrýymen Túrikmenstan ádebıetiniń klassıgi, aqyn, fılosof Maqtymqulynyń 300 jyldyq mereıtoıyna arnalǵan saltanatty kesh ótti.
Is-sharaǵa Mádenıet jáne aqparat mınıstrligi, Arhıv, qujattama jáne kitap isi komıteti tóraǵasynyń orynbasary Rollan Quspan, О́zbekstan, Túrikmenstan, Tájikstan, Ázerbaıjan, Belarýs, Qyrǵyzstan respýblıkalarynyń Tótenshe jáne ókiletti elshileri, Parlament Májilisiniń depýtattary jáne zııaly qaýym ókilderi qatysty. Akademık Baýyrjan Omaruly, professorlar О́mirzaq Ozǵanbaı, Amantaı Shárip, Serik Negımov baıandama jasady.
Arhıv, qujattama jáne kitap isi komıteti tóraǵasynyń orynbasary Rollan Quspan óz sózinde Maqtymqulynyń 300 jyldyq mereıtoıy IýNESKO-nyń 2024-2025 jyldarǵa arnalǵan mereıtoılyq kúnder tizbegine engizilgenin atap ótti.
– Aıtýly mereke qazaq halqy úshin de aıtýly is-shara retinde atalyp ótýi erekshe mańyzǵa ıe. Qazaq ádebıetiniń shoqtyǵy bıik tulǵalarymen úndes, pikirles saryny jáne túrki halyqtaryna ortaq murasynyń ómirsheńdigimen qundy. Maqtymqulynyń murasy halqymen, túrki halyqtarymen birge jasaı beredi, – dedi Rollan Quspan.
Túrikmenstannyń Qazaqstandaǵy elshisi Batyr Redjepov aqynnyń shyǵarmashylyǵy keıingi kezeńdegi túrikmen poezııasynyń damýyna edáýir áser etkenin jetkizdi.
– Onyń óleńderi men shaǵyn poemalary halyq shyǵarmashylyǵyna tili boıynsha jáne poetıkalyq tásilderimen jaqyn bolyp, halyqtyń jadynda búgingi kúnge deıin urpaqtar úshin danalyq pen poetıkalyq shabyt kózi retinde saqtalǵan. Túrki halqyna ortaq tulǵanyń ómirsheń shyǵarmashylyǵyn nasıhattaýǵa nazar aýdaryp, aıtýly mereıtoıdy atap ótýge qoldaý bildirgen qazaqstandyqtarǵa alǵys bildiremin, – degen elshi Qoljazbalar jáne sırek kitaptar ulttyq ortalyǵynyń qoryna aqynnyń túrikmen tilinen aýdarǵan «Maqtymquly Pyraǵy» tańdamaly óleńderin tabys etti.
Jıyn aıasynda Túrikmenstannyń akteri Batyr Charyev «Túrikmen» óleńin oqysa, «Qazaqkonserttiń» ártisi Dinıslam Jaılaýbaev Maqtymqulynyń el arasyna keń jaıylǵan termesin oryndady.
Is-sharada Maqtymqulynyń shyǵarmashylyǵyna arnalǵan kórme ashylyp, aqynnyń túpnusqadaǵy qoljazbalary men óleń jınaqtary tanystyryldy.
