Sýretti túsirgen – Jangeldi ÁBDIǴALYM
Bul joly Alashtyń úsh báıteregi – Sáken Seıfýllınniń, Ilııas Jansúgirovtiń, Beıimbet Maılınniń 130 jyldyǵyna jáne Halyqaralyq kitap syılaý kúnine oraı «Bir kitap – bir álem» atty kitap syılaý jármeńkesi jarasym tapty. Buǵan stýdentter men ýnıversıtet oqytýshylarynan bólek, zııaly qaýym ókilderi qatysty.
Ýnıversıtet stýdentteriniń arasynda «kitap – qazyna» atty kitap oqý baıqaýy ótipti. Merekelik is-shara bastalmas buryn, baıqaýdyń jeńimpazdary saltanatty túrde marapattaldy. Júldegerlerge aqshalaı sertıfıkat tapsyryldy.
Uıymdastyrýshylar kitap syılaý aksııasyn erekshe formatta ótkizdi. Ortaǵa qoıylǵan eki ústeldiń bireýine – stýdentterdiń, ekinshisine – qalamgerlerdiń, ǵalymdardyń jáne basqa da arnaıy shaqyrylǵan qonaqtardyń esimi jazylǵan paraqtardy qaz qatar qoıǵan. Kóshti ýnıversıtettiń basqarma tóraǵasy Nurlan Dýlatbekov bastady. Ol óz kitabyn bir stýdentke tartý etip, jyly lebizin de bildirdi.
– Kitap – dúnıedegi ǵajaptardyń qataryna enip turǵany sózsiz. Qaı ýaqytta da solaı bolǵan jáne bola da bermek. Adamzat qoǵamy izgilikke jetýi úshin kitap oqýǵa tıis. Oqýdan ajyraǵan kúni biz keri ketemiz. Kitap syılaý – bul jas urpaqtyń keleshegi úshin jasalatyn eń úlken jaqsylyqtyń, qaıyrymdylyqtyń biri. Ýnıversıtetimizde mundaı shara osymen ekinshi ret uıymdastyrylyp otyr. Ári qaraı da jalǵasyn tabady dep senimmen aıtamyn. Maqsaty – bilim áleminiń tereńine boılaý. «Kitap – bilim bulaǵy» deıdi. Stýdentterimiz kitap oqysa, biz úshin sol úlken qýanysh, – dedi N.Dýlatbekov.
Stýdent óziniń kezeginde kitabyn qurmetti qonaqtardyń birine berdi. Solaı jalǵasyp ketti. Tizimde «Ǵasyr adamy» Temirǵalı Kóketaev ta bar.
– Myńjyldyqtarǵa sozylǵan adamzat kóshiniń bilgen, túıgeni – osy kitapta. «Adamzat balasynyń negizgi muraty – ózinen keıin mura qaldyrý» dep edi bir oıshyl. Bilimdi bolǵyń kelse, parasatty, paıymdy bolǵyń kelse – kitap oqý kerek. Qazir bizdiń memleketke sanaly, aqyldy jastar aýadaı qajet. Ýnıversıtet basshylyǵyna osyndaı taǵylymdy sharany uıymdastyrǵany úshin zor alǵysymdy bildiremin, – dep alǵysyn jaýdyrdy «Ǵasyr adamy».
Abaı atyndaǵy memlekettik syılyqtyń laýreaty, aqyn Serik Aqsuńqaruly óleń oqydy.
Jármeńke sońynda ýnıversıtet stýdentteri qurǵan «Shattyq» áýesqoılar teatry «Bir túp alma aǵashy» qoıylymyn sahnalady.
Qaraǵandy oblysy
