Kórmeden oryn alǵan kórnekti eksponattardyń qatarynda Sh.Aımanovtyń «Aldar kóse» fılmine túskende qolyna ustaǵan asataıaǵy, ózi shertken dombyrasy, shahmat taqtaıshasy, túsirilim alańynda paıdalanǵan rýpor, sondaı-aq 1970 jyly «Atamannyń aqyry» fılmi túsirilgen kamera, kıimderi, qalamsaptary men ústel saǵaty sekildi erekshe jádigerler bar.
Eske alý keshinde Sh.Aımanovtyń izin jalǵap kele jatqan sahna sańlaqtary aıtýly tulǵanyń azamattyq bolmysy, kásibı sheberligi, uıymdastyrýshylyq qabileti haqynda oı bólisti. Atap aıtqanda, Sh.Aımanovtyń áıgili shákirtteri, qazaq kınosynyń shoqtyǵy bıik tulǵalary Qazaqstannyń Eńbek Eri Asanáli Áshimov, Qazaqstannyń halyq ártisi Nurjuman Yqtymbaev syndy óner qaıratkerleri ulttyq teatr óneri men kıno salasynyń qalyptasýyna búkil ǵumyryn arnaǵan tulǵa týraly jyly estelikterimen bólisti.
«Sháken aǵa darqan adam bolatyn. Jan-jaǵyna Jaıyqtaı keń edi. Biz ol kisiniń balapany qusap janyna erip júretinbiz. Onyń aqyndyq qasıeti baryn kóp adam bile bermeıdi. «Áke týraly jyr» degen ánniń sózin jazǵanyn, talaı fılmdegi jyr joldaryn, ánderdi laıyqty kórkemdeı biletin talǵamy bıik talant edi. Qazaq mádenıetiniń óristeýine óreli úles qosqan qaıratkerdiń rýhyna qalaı qurmet jasasaq ta jarasady», deıdi Nurjuman Yqtymbaev.
Memlekettik ortalyq mýzeı dırektorynyń ǵylymı jumystar jónindegi orynbasary Ǵalııa Temirtonqyzy mereıtoı ıesiniń janrlyq, taqyryptyq keńistigi týraly sóz qozǵap, «Bizdiń súıikti dáriger», «Aldar Kóse», «Taqııaly perishte» sekildi halyqtyq komedııalar áli kúnge deıin kórermenniń yqylasyna bólenip kele jatqan, eskirmeıtin týyndylar ekenin atap ótti.
ALMATY
