Aýqymdy aýksıonǵa qazaq sýretshileriniń kartınalary men kásipkerlerdiń qundy syı-sııapattary usynyldy. Osyndaı erekshe formatta qaıyrymdylyq jasaý úrdisi birlestiktiń dástúrli is-sharasyna aınalǵan. Byltyr ótkizilgen aýksıonnyń nátıjesinde turmysy tómen, obyr aýrýyna shaldyqqan, bes balany jalǵyz tárbıelep otyrǵan anaǵa jataqhanadan bir bólme syıǵa tartylǵan edi. Al búgingi is-sharadan túsken qarajat úshinshi top múgedegi, obyr aýrýymen kúresip otyrǵan, sonymen qatar úsh balasymen ýaqytsha jertóleni jaldap turyp jatqan Samal Kárimovaǵa qoldaý kórsetýge jumsaldy. Uıymdastyrýshylardyń maqsaty – Samalǵa jekemenshik baspana syılap, em-domyna qajet dári-dármekpen qamtamasyz etý. Birlestik tóraǵasy Aıjan Muqataevanyń aıtýynsha, ár túsken qarajattyń esebi áleýmettik jelide ashyq jarııalanady.
– Qaıyrymdylyq jasaý – júrektiń isi. Osynaý ıgilikti is – qazaq halqynyń da boıyna sińgen qasıet. Jylý jınaý, asar uıymdastyrý – ujymdyq kómek kórsetýdiń aıqyn úlgisi. Osy dástúrden jańylmaı biz de qaıyrymdylyq is-sharasyn zamanǵa saı qalyptap, ony saltanatty jaǵdaıda ótkizdik, – deıdi ol.
Aıta keteıik, aýksıondaǵy syılyqtardyń eń arzany – 200 myń, al eń qymbaty 800 myń teńgege satyp alyndy.
