Qoǵamdy balalarǵa qarsy aýyr qylmystar men zorlaý máselesi erekshe alańdatyp otyrǵanyn bilemiz. Sondyqtan Prezıdent mundaı qylmystar úshin jazany qatańdatyp, zorlyqshyny barynsha oqshaý ustaýdy tapsyrdy. Endi jańa zań boıynsha pedofılder túrmeden eshqashan shyǵa almaıdy. Sondaı-aq ótelmegen jaza merzimi qysqartylmaıdy nemese jazanyń jumsaqtaý túrimen aýystyrylmaıdy. Pedofılder raqymshylyq ala almaıdy. Oǵan qosa, endi balalarǵa qarsy jasalǵan aıaýsyz, aýyr qylmystar boıynsha bitimgershilik qarastyrylmaıdy.
Kelesi asa ózekti máseleniń biri – turmystyq zorlyq-zombylyq. Statıstıkaǵa júginsek, kóbine áıelder men balalar zorlyq-zombylyqqa jıi ushyraıdy. Elimizde jyl saıyn turmystyq zorlyq-zombylyq saldarynan júzdegen azamat kóz jumady. Bul másele de Prezıdenttiń baqylaýynda tur.
Uryp-soǵý men densaýlyǵyna jeńil túrde zııan keltirý qylmys túri Ákimshilikten Qylmystyq kodekske aýystyryldy. Uryp-soǵý faktileri boıynsha, tipti jeńil túri bolsa da qylmysker Qylmystyq kodekspen jazalanady. Sondaı-aq azaptaý boıynsha jańa bap qoldanysqa enip, 3 jylǵa deıin bas bostandyǵynan aıyrý jazasy qarastyrylǵan.
«Amanat» partııasy áıelder men balalardyń qaýipsizdigine kepildikti kúsheıte túsetin túzetýdi qysqa merzimde engizý qajettigin árkez qoldady. Fraksııa depýtattary sessııanyń alǵashqy kúninen bastap osy máseleni Bala quqyqtary jónindegi ýákil Dınara Zákıevamen júıeli pysyqtap, úkimettik emes uıymdar ókilderiniń qatysýymen Májilis fraksııasynyń otyrystarynda jan-jaqty qarastyrdy.
Álemniń osy tektes zańnamalaryn salystyryp qaraıtyn bolsaq, Qazaqstan qabyldap otyrǵan bul zań – halyqaralyq tájirıbede, TMD elderi ishindegi eń qatańdarynyń biri. Zań jobasyn keshendi, júıeli, tıimdi ári tolyqqandy pysyqtalǵan zań dep aıtýǵa tolyq negiz bar. Zań jobasyn qabyldaý arqyly biz áıelder quqyǵy men balalar qaýipsizdigin qamtamasyz etý máseleleri boıynsha zańnamany qatańdatýdy kózdeıtin túzetýler engizý sıklin aıaqtaımyz.
Elnur BEISENBAEV,
Májilis depýtaty
