Prezıdent memlekettiń ártarapty damýy úshin mańyzdy máselelerdi kóterip, Úkimet pen aımaq basshylarynyń, tıisti mınıstrlikterdiń aldyna jańa mindetter qoıdy. Q.Toqaev ekonomıkaǵa jetkilikti qarajat salynbaýy qıyndyqqa soqtyrýy múmkin ekenin, sol sebepti Úkimettiń jańa ınvestısııalyq kezeńdi bastaý qajettigin aıtty. Bul turǵyda jańadan qurylǵan Investısııalyq shtabtarǵa júkteletin mindet pen senim júgi aýyr. О́ńirlerdegi ákimderdiń qyzmetine baǵanyń ınvestısııa tartýyna qarap beriletini de kóńilge qonymdy, áıtpese qolda bar aqshaǵa senip, bar qarajat kólemine qaraı qımyldaıtyn ákimder joq emes. Sondaı-aq mekeme basshylarynan shetelge jasaǵan issaparlarynyń qorytyndysy suralatyny – maǵynasyz júris-turysty shektep, nátıjege jumystanýdy qadaǵalaýǵa jasalǵan qadam. Buǵan deıin alys-jaqyn shetelderge qanshama issapar boldy, biraq nátıjesi belgisiz.
Aqtaý qalasyndaǵy «Aqtaý teńiz porty» arnaıy ekonomıkalyq aımaǵynda óńirge ınvestısııa salý maqsatynda kelip, kásiporyndaryn ashqan birqatar sheteldik kompanııa bar. Aldaǵy ýaqytta bul baǵyttaǵy jumystar jalǵasyn taýyp, ınvestorlar kelý qarqyny arta túsedi. Sebebi teńiz jaǵasynda ornalasqan, týrıstik tartymdylyǵy joǵary, ózindik óndiristik áleýeti bar Mańǵystaýǵa sheteldik ınvestorlardyń qyzyǵýshylyǵy qashanda bar.
Aımaqtyń ınvestısııalyq áleýeti joǵary ekenin onyń strategııalyq ornalasýy jáne qolaıly bıznes ortasy retinde aıqyndalýy kórsetedi. О́ńirdiń tabysy ınvestısııalyq qyzmettiń tıimdiligimen tikeleı baılanysty. О́ıtkeni ınvestısııalar – jalpy aımaqtyq ónimge áser etetin mańyzdy faktor. О́ńirdiń strategııalyq josparyna sáıkes, bul baǵyttaǵy birqatar joba óndiristik qýattylyqty ulǵaıtýǵa, jalpy ekonomıkanyń birqatar salany damytýǵa yqpal etýmen qatar, oblystyń áleýmettik-ekonomıkalyq damýyna mýltıplıkatıvtik yqpal etedi.
Aıgúl ESTÝRLIEVA,
Sh.Esenov atyndaǵy Kaspıı tehnologııalar jáne ınjınırıng ýnıversıtetiniń professory
