Tarıhı júlde

Parsy shyǵanaǵynda Qytaı eliniń ókilderi 33 ret jeńis tuǵyryna kóte­rildi. Tarqatyp aıtsaq, olar 23 altyn, 8 kúmis jáne 2 qolany oljalap, jalpy esepte jeke-dara kósh bastady. Ekin­shi oryndy AQSh quramasy oljalady. Olar 23 júldege (9 altyn+6 kúmis+8 qola) qol jetkizdi. Úzdik úshtikti Aýstralııa túıindedi. Jasyl qurlyqtyń ókilderi 24 medaldy (7+12+5) moınynda jarqyratty. Sondaı-aq TOP-10-dyqtyń qatarynda Nıderland (5+4+0), Ulybrıtanııa (4+5+9), Italııa (3+10+6), Kanada (2+3+6), Ońtústik Koreıa (2+1+2) jáne Jańa Zelandııa men Shvesııa (2+1+1) quramalary bar. Bul jarysta 23 memlekettiń ánurany shyrqalyp, 34 eldiń týy kókte jelbiredi.

Bir-bir altynnan oljalaǵan Qazaq­stan men Horvatııanyń sportshylary jalpyesepte 22-23-oryndardy ózara bólisti. Balqan túbeginen kelgen koman­danyń abyroıyn asyrǵan vaterpolshy jigitter bolsa, Qazaq eliniń ánuranyn shyrqatqan – Nargız Bolatova men Edýard Kım. Olardyń ekeýi de – bolashaǵynan zor úmit kúttiretin jas órender. Nargızdiń jasy – 20-da, Edýard – nebári 18-de. Ártistik jú­zý­diń tehnıkalyq baǵdarlamasy boıyn­sha aralas juptar saıysynda óner kórsetken otandastarymyz Qatardyń astanasynda nebir myqtylardy artqa tastap, bas júldeni ıelendi. Bul – Qazaqstannyń sý sporty tarıhyndaǵy álem chempıonatynyń tuńǵysh altyny. Bolatova men Kımge deıin birde-bir jerlesimiz bul belesti baǵyndyra almaǵan edi.

Jarys aıaqtalǵannan soń BAQ ókilderine bergen suhbatynda Nargız ben Edýard: «Tórtkúl dúnıeniń teńdessizderi jınalǵan jarysta jeńis tuǵy­ryna kóterilý, árıne, ońaı sharýa emes. Biz eren eń­bek pen jankeshti jattyǵý ar­qyly orasan zor ta­bysqa qol jetkizdik. Bul rette bap­kerlerdiń de osy jeńiske qosqan úlesi súbeli. Shyny kerek, biz Dohada altyn alamyz dep esh oılaǵan joqpyz. Biraq jeńis tuǵyryna kóterilýdi armandaǵanymyz ras. Keýde túpkirinde bir úmit boldy. Sol asqaq arman men úkili úmit kóz ar­baǵan bıik­terge jeteledi. Aqyry bizge jer-jahannyń myqtylary jınalǵan jarys­ta Qazaqstannyń ánuranyn shyrqatý baqyty buıyrdy. Biraq bul tabysqa toqmeıilsip, qol qýsyryp, beıjaı oty­ratyn jaıymyz joq. Alda áli de kóptegen dúbirli doda bar. Endi jatpaı-turmaı soǵan daıarlanamyz. Keıingi kezderi tehnıkalyq aralas juptar saıy­sy Olımpıadanyń baǵdarlamasyna enetini jaıynda áńgimeler jıi aıtylyp júr. Bul beker emes shyǵar. «Jel soqpasa, shóptiń basy qımyldamaıtyny» belgili ǵoı. 2028 jyly Los-Andjeleste alaýy tutanatyn jazǵy oıyndarǵa deıin osy másele oń sheshimin tapsa, tamasha bolar edi. Bul – osy sport túrin serik etken barsha ul-qyzdardyń armany. Eger bári biz oılaǵandaı bolsa, onda jahandyq dodada da daralaný úshin esh aıanyp qalmaıtynymyz anyq», dep aqtaryla sóıledi.

О́tkenge zer salsaq, sý spor­tynan álem chempıo­naty 1973 jyldan beri úz­diksiz uıymdastyrylyp keledi. Sol kezden beri 25 jarystyń jalaýy jel­biredi. Biraq jarty ǵa­syrdan asa ýaqyt aralyǵynda Qazaq­stannyń óren­derine jalǵyz qola medal buıyr­ǵan edi. Sonyń ózine byltyr ǵana qol jetkize aldyq. Atalǵan júldeniń ıegeri – Almaty qalasynda ornalasqan Qarken Ahmetov atyndaǵy sporttaǵy daryndy balalarǵa arnalǵan mektep-ınternat-kolledjdiń oqýshysy Edýard Kım. Bilikti maman Ernar Ybyraıymov jetekshilik etetin qazaq sportynyń qara shańyraǵynyń túlegi Japonııanyń Fýkýoka qalasynda ártistik júzýdiń tehnıkalyq baǵdarlamasynyń jekelegen saıysynda qola medaldy moınynda jarqyratty. Sondaı-aq kúni keshe ǵana Parsy shyǵanaǵynda Kımmen birge juptasyp óner kórsetip, altynnan alqa taqqan qazaq qyzy Nargız Bolatova byltyr dál sol kolledjdi támamdaǵan.

Al oǵan deıin nátıjelerge keletin bolsaq, 2015 jyly Dmıtrıı Balandınniń jeńis tuǵyryna kóterilýge zor múmkindigi boldy. Tatarstannyń Qazan qalasynda jalaýy jelbiregen jarystyń 100 metr­ge brass ádisimen júzý saıysynda ol basty qarsylastarynan sál ǵana qalyp qoıyp, tórtinshi oryndy qanaǵat tutty. Esesine kelesi jyly otandasymyz Rıo Olımpıadasynda aıdy aspanǵa bir-aq shyǵaryp, altyn tuǵyrdan qol bulǵady. El maqtanyshyna aınalǵan Balandın 2015 jyly Qazanda altynshy oryn alsa, 2019 jyly Kvandjýda eki ret jetinshi satyǵa turaqtady. Sondaı-aq 2017 jyly Býdapeshtegi básekede Qazaqstannyń taǵy bir júzýshisi Vıtalıı Hýdıakov úzdik jeti sportshynyń qatarynan kórindi. Mine, sý sportyndaǵy eń úzdik nátıjelerimiz – osy.