Atalǵan jarysty Qazaqstannyń oıynshylary jeńispen bastaǵany jaıynda biz buǵan deıin jazdyq. Toptyq týrnırdiń birinshi týrynda erler komandasy Saýd Arabııasyna (3:0) san soqtyrsa, áıelder quramasy Aýstralııadan (3:2) aılasyn asyrdy. Kelesi kúni jerlesterimiz 2016 jylǵy álem chempıonatynyń qola júldegeri Anglııaǵa qarsy oınaǵanda Qazaqstannyń Koreıa Respýblıkasyndaǵy Tótenshe jáne ókiletti elshisi Nurǵalı Arystanov bastaǵan bir top laýazym ıeleri sportshylardy qoldaý maqsatynda arenaǵa arnaıy keldi. Alaıda azýly aǵylshyndarǵa álimiz jetpedi. Kırıll Gerasımenko Pol Drınholl men Lıam Pıtchfordty utqanymen, Alan Qurmanǵalıev pen Aıdos Kenjeǵulov qarsylastaryna ese jiberdi. Esep – 2:3.
Úshinshi kúni jigitter Olımpııa oıyndary (3 qola) men álem chempıonattarynda (7 kúmis, 2 qola) atoı salyp júrgen Germanııamen kúsh synasty. Bul kezdesý bizdiń jigitter úshin sátti bastaldy. Gerasımenko Olımpıadanyń alty (2 kúmis, 4 qola), álem chempıonatynyń bes (4 kúmis, 1 qola) dúrkin júldegeri, Eýropa oıyndary (3 altyn), qurlyq chempıonaty (10 altyn,3 kúmis, 2 qola ) jáne Álem kýboginde (1 altyn, 4 qola) san márte atoı salǵan dańqty Dmıtrıı Ovcharovtan 3:1 esebimen basym tústi. Barsha mamandar bul nátıjeni sensasııaǵa balady.
Kóp keshikpeı Gerasımenko komandalyq saıysta álem chempıonatynyń kúmis júldegeri, jekelegen básekede Eýropanyń úsh dúrkin chempıony, Eýropa oıyndarynyń eki márte jeńimpazy Sıý Dannan 0:2 esebimen utylyp jatsa da, saly sýǵa ketken joq. Kerisinshe, sheshýshi oıyndarǵa ol shıryǵyp shyqty. Sońǵy úsh partııada qarqynyn kúrt kúsheıtken elimizdiń birinshi raketkasy jeńisti qarsylasynyń ýysynan julyp aldy – 3:2. Biraq Kırılldiń jeńisti jolyn komandalyq áriptesteri jalǵastyra almady. Nátıjesinde, nemisterdiń asyǵy alshysynan tústi. Qorytyndy esep – 2:3.
Tórtinshi týrda kileń legıonerlerden jasaqtalǵan AQSh quramasymen aıqastyq. Bul joly da asqan sheberlik tanytqan Gerasımenko Sıd Naresh pen Nıkhıl Kýmardy qapy qaldyrdy. Kenjeǵulov Lıshan Lıannan basym tústi. Qurmanǵalıev Kýmardan utyldy. Osylaısha, jerlesterimiz bul básekeni 3:1 esebimen óz paıdasyna sheshti. Nátıjesinde, Qazaqstannyń ústel tennısshileri 2 topta ekinshi oryndy ıelenip, jarysty odan ári jalǵastyrý quqyǵyna ıe TOP-24 komandanyń qataryna qosyldy. Biz tek Germanııadan ǵana qalyp qoıdyq. Endi otandastarymyz 1/8 fınalǵa shyǵý úshin Úndistanmen kezdesedi.
Al elimizdiń áıelder quramasynyń jaǵdaıy máz emes. Chempıonattyń tusaýkeser kezdesýinde Aýstralııadan (3:2) aılasyn asyrǵan olar ekinshi týrda Aýstrııaǵa ese jiberdi. Bul oıynda Záýresh Aqasheva Sofııa Polkanovaǵa (Eýropanyń eki dúrkin chempıony), Sarvınoz Mirqadyrova Lıý Szıage (Evropa chempıony, alty Olımpıadaǵa qatysýshy) jáne Anastasııa Lavrova Karolına Mıshekke jarytyp qarsylyq kórsete almady – 0:3. Gonkongqa qarsy kezdesýde dál sondaı eseppen aıaqtaldy – 0:3. Olımpııa oıyndary men álem jáne qurlyq birinshilikterinde talaı ret jeńis tuǵyryna kóterilgen Chjý Chenchjý, Lı Ho Chın jáne Dý Hoıkem syndy myqtylarǵa Sarvınoz Mirqadyrova, Angelına Romanovskaıa jáne Ánel Baqyttyń áli jetpedi. Toptyq týrnırdegi sońǵy oıyndy Portýgalııaǵa qarsy ótkizip, Pıreneı túbeginiń ókilderinen taza jeńildik – 0:3. Sóıtip, burymdylarymyz óz tobynda tórtinshi orynda qalyp qoıdy.
