Atyraý qalalyq polısııa basqarmasy áıelderdi zorlyq-zombylyqtan qorǵaý tobynyń ınspektory Áıgerim Oraqbaevanyń bergen málimetine súıensek, keıingi eki jylda otbasynda zorlyq-zombylyqqa qatysty 5 myńǵa jýyq quqyq buzýshylyq jasalǵany anyqtalǵan. Al áıelderge qarsy 15 qylmystyq is tirkelgen.
«Otbasyndaǵy zorlyq-zombylyq azaımaı otyr. Máselen, keıingi eki jylda oblys ortalyǵynda osyndaı 5 myńǵa jýyq quqyq buzýshylyq anyqtaldy. Osyǵan baılanysty 4 770 adam Ákimshilik quqyq buzýshylyq týraly kodeksiniń 73, 73-1 jáne 73-2-babymen ákimshilik jaýapkershilikke tartyldy. Onyń ishinde 3 145 adamǵa qorǵaý nusqamasy shyǵaryldy. Áıelderge zábir kórsetýge qatysty 15 qylmystyq is qozǵaldy. Qorǵaý nusqamasyn bir aı ishinde buzyp, agressııalyq minez-qulyq kórsetken 196 adam osy zańnyń 461-babyna sáıkes jazalandy», dedi Á.Oraqbaeva.
Jergilikti polısııa qyzmeti basqarmasy áıelderdi zorlyq-zombylyqtan qorǵaý tobynyń erekshe tapsyrmalar jónindegi aǵa ınspektory, polısııa maıory Raısa Aıtjanovanyń aıtýynsha, turmystyq zorlyq-zombylyq kórsetýdiń birneshe sebebi anyqtalyp otyr. Birinshiden, buǵan maskúnemdik áser etedi. Ekinshiden, qyzǵanyshtyń sońy kıkiljińge, tipti zorlyq-zombylyqqa ulasady. Úshinshiden, jumyssyzdyqtyń saldarynan erli-
zaıyptylar arasynda arazdyq týyndaıdy.
«Bıyl qańtar aıynda polısııaǵa turmystyq zorlyq-zombylyqqa ushyraýǵa baılanysty 399 shaǵym tústi. Ospadar otaǵasynyń zańǵa qaıshy áreketiniń kesirinen 15 adam daǵdarys ortalyǵyna ornalastyryldy. Onyń ishinde 4 áıel, 11 bala bar. Al 272 adam Ákimshilik quqyq buzýshylyq týraly kodeksiniń 73-babymen (Otbasy-turmystyq qatynastar aıasyndaǵy quqyqqa qarsy áreketter) jaýapkershilikke tartyldy. Bulardan ózge 290 adamǵa qatysty bir aı merzimge qorǵaý nusqamasy shyǵarylǵan edi. Biraq sol kezeńde ersi minez-qulqyn kórsetip, qorǵaý nusqamasyn buzǵan 19 adam jazalandy. Májbúrlep emdeý mekemesine 3 adam jiberildi», deıdi R.Aıtjanova.
Onyń aıtýyna qaraǵanda, Atyraý qalasynda daǵdarys ortalyǵy, Jylyoı men Qurmanǵazy aýdanynda arnaıy kabınet ashylǵan. Maqsat – otbasynda zorlyq-zombylyqqa ushyraǵan áıelderge qoldaý kórsetý.
«Jýan judyryǵyn ala júgiretin kúıeýinen zábir kórgen áıelder nemese osyndaı oqıǵaǵa kýá bolǵandar ishki ister organyna aryzben júginýi qajet. Polısııa qyzmetkerleri jábirlenýshilerge quqyqtyq keńes, psıhologııalyq kómek kórsetedi. Jábirlenýshilerdi áperbaqan kúıeýden qorǵaý úshin jeke profılaktıkalyq sharalardy qolǵa alyp, daǵdarys ortalyǵyna baǵyttaıdy», dep túsindirdi R.Aıtjanova.
Atyraý oblysy
