Ázirge qorjynymyzda eki joldama ǵana bar. Ony byltyr Qytaıdyń Hanchjoý qalasynda ótken Azııa oıyndarynda Qamshybek Qońqabaev (+92 kg) pen Karına Ibragımova (57 kg) jeńip aldy. Al qalǵan lısenzııalar úshin Sáken Bıbosynov (51 kg), Mahmud Sabyrhan (57 kg), Muhammedsabyr Bazarbaıuly (63,5 kg), Aslanbek Shymbergenov
(71 kg), Nurbek Oralbaı (80 kg) jáne Aıbek Oralbaı (92 kg) syndy sańlaqtar talassa, áıelder saıysynda Alýa Balqybekova (50 kg), Jaına Shekerbekova (54 kg), Rımma Volosenko (60 kg), Natalıa Bogdanova (66 kg) jáne Valentına Halzova (75 kg) óner kórsetedi.
Apennın túbegindegi aıqasta Olımpııa oıyndarynyń joldamasy ár salmaq dárejesinde úzdik shyqqan tórt myqtyǵa beriledi. Iаǵnı jartylaı fınalǵa deıin jetken bylǵary qolǵap sheberleri Parıjde kúsh synasý quqyǵyna ıe bolady. Barlyǵy – 28 lısenzııa. Ol jospardy oıdaǵydaı júzege asyrýǵa bizdiń jýan judyryqty jigitterimizdiń kúsh-jigeri jetedi dep oılaımyz. Al sátsiz óner kórsetken boksshylar mamyr aıynyń sońynda Bangkokta uıymdastyrylatyn týrnırge qatysady. Taı eliniń bas shaharynda da biraz joldama taratylady.
Áıelder arasyndaǵy jarysta ár memleketten kelgen burymdylar 21 lısenzııa úshin saıysqa túsedi. «Olarǵa tıesili joldamalar sany nelikten jigitterden kem» degen saýal týyndasa, oǵan aıtar jaýabymyz daıyn. О́ıtkeni Parıj Olımpıadasynda erler jeti salmaqta judyryqtassa, qyzdar alty salmaq dárejesinde óner kórsetedi.
