Kim bolsań da, qaıda júrseń de týǵan jerińdi umytpaǵan abzal. Memleket basshysy Qasym-Jomart Toqaev aldymen aýylǵa sol topyraqtan túlegen azamattardyń jany ashýy kerek ekenin aıtqan edi. Sebebi syrttan kelip eshkim qushaq jaımaıdy. Sondyqtan kásipkerdiń erligi kóńil súıindiredi.
Sarqan aýdany ákimdiginiń málimetinshe, mesenat aýdandyq aýrýhananyń bos turǵan úı-jaıynyń shaǵyn bóligine jóndeý jumystaryn júrgizip, gemodıalız qyzmeti úshin arnaıy jabdyqtar ákelip ornatqan. Ortalyq ornalasqan alańnyń kólemi – 85,2 sharshy metr. Oryndy jalǵa alý aqysy memlekettik bıýdjetke tólenedi.
Osylaısha, 19 myń turǵyny bar Sarqan qalasynda búırektiń sozylmaly jetkiliksizdigi aýrýyna shaldyqqan adamdardyń qanyn tazalap, qalypty ómir súrýin qamtamasyz etetin ortalyq iske kiristi. Buryn syrqattar gemodıalız alý úshin Sarqannan 151 shaqyrym jerdegi oblys ortalyǵyna qatynaıtyn bolsa, endi olarǵa alysqa jol tartýdyń qajeti joq. Turǵyndardyń mereıi tasyp, kóńili alyp-ushyp júr. Áýeli ortalyqtyń ashylýymen turǵyndardy aýdan ákimi Ǵalymjan Mamanbev quttyqtap, eljandy azamatqa alǵysyn bildirdi.
«Osy ýaqytqa deıin aýdanda mundaı ortalyq bolmaǵandyqtan, sozylmaly búırek aýrýlary bar azamattardyń Taldyqorǵan qalasyna barýyna týra keldi. Jol alys emes, degenmen kezek kútip, syrqat adamnyń ári-beri qatynaýy ońaı emes. Onyń ústine qalaǵa aýyl-aýyldan em izdep keletinder qanshama? Adam ómiri – eń qymbat qundylyq, densaýlyq eshqandaı aqshamen ólshenbeıdi. Osy rette Azamat baýyrymyzdyń ıgi isine alǵys bildiremin», dedi Ǵ.Mamanbaev.
Ortalyqta Germanııada jasalǵan qural-jabdyqtar ornatylǵan. Munda bir mezgilde 4 naýqas em qabyldaı alady. Medısınalyq qyzmet tegin medısınalyq kómektiń kepildendirilgen kólemi aıasynda MÁMS júıesi arqyly tegin kórsetiledi. Turǵyndar aldyn ala dárigerdiń anyqtamasy arqyly tekserilýine bolady.
«Emdeý úderisi ár adamǵa aptasyna 3 ret júrgiziledi. Bir seansqa shamamen 4 saǵat jumsalady. Búginde Sarqan aýdanynan bólek Aqsý jáne Alakól aýdandarynyń jaqyn aımaqtarynyń naýqastaryn qosa alǵanda 10 azamat em alyp jatyr. Olardyń densaýlyǵy jiti qadaǵalaýymyzda. Qalada kórsetken em-domdy osynda alýǵa bolady», deıdi dáriger Oljas Baıjanov.
Almaty qalasynyń «Bios» klınıkalyq bazasynan arnaıy bilim alǵan bilikti dáriger áriptesi Murat Bólegenovpen birge ortalyqta naýqastarǵa arnaıy medısınalyq kómek kórsetedi. Qazir qos dárigerge qaralýǵa asyq alys-jaqyn aýdandardan kelgen halyqtyń qarasy kóp. Olar arnaıy kezekpen kelip, tekserilip jatyr.
Osy rette jetisýlyq dárigerlerdiń isine adaldyǵyn aıta ketý kerek. Árıne, medısına salasynda kúndelikti ártúrli jaǵdaılar oryn alyp jatady. Onyń bárine aq jeleńdilerdi kinálaı bergenimiz durys emes. Máselen, ótken jyldyń jeltoqsan aıynda Úshtóbe qalasyndaǵy úılerdiń birinde jylý júıesiniń jarylýy saldarynan 2017 jáne 2021 jyly týǵan eki bala termııalyq kúıik pen jaraqat alǵan edi. Sóıtip, qos búldirshin Kópsalaly oblystyq balalar aýrýhanasyna aýyr jaǵdaıda túsken edi. Dárigerlerdiń der kezinde kórsetken medısınalyq kómeginiń nátıjesinde eki bala da aman qaldy. Olarǵa medısınalyq avıasııa jelisi boıynsha kómek kórsetilip, balalar reanımasııada em aldy.
«Deneniń 85 paıyzy termııalyq kúıik alǵan bala reanımasııa bóliminde baqylaýda bir aı boldy. Olarǵa joǵary tehnologııalyq medısınalyq kómek kórsetildi. Búgin bala úıge aman-esen shyǵaryldy. Onyń inisi reanımasııa bólimine bet, moıyn, keýde qýysynyń aldyńǵy jaǵy, eki joǵarǵy aıaq-qol aımaǵynda, deneniń aldyńǵy qabyrǵasynda, tómengi eki aıaqtaǵy kúıikpen túsken bolatyn. Sátti emdeýden keıin 12 qańtarda aýrýhanadan shyǵaryldy», deıdi balalar hırýrgi Daýren Tasbolatov.
Onyń aıtýynsha, deneniń 40 paıyzdan astamy kúıik alǵan jaǵdaılarda óte aýyr jaraqat bolyp sanalady. Bul balalarda deneniń zaqymdanýy 80 paıyzdan asqan. Qaıta dárigerlerdiń biliktiligimen ońalǵan.
Taldyqorǵan qalasynyń reanımatolog, travmatolog jáne hırýrg dárigerlerdiń kásibı jáne janqııarlyq áreketteriniń nátıjesinde ǵana balalarda asa aýyr asqynýlardy boldyrmaı, zaqymdalǵan aıaq-qoldardyń fýnksııalaryn tolyǵymen qalpyna keltire otyryp qutqardy. Búginde kishkentaı pasıentterdiń ómiri men densaýlyǵyna eshqandaı qaýip tónip turǵan joq.
Jetisý oblysy
