Sondaı jigerli jastyń qatarynda Baýyrjan Daıyshqalıev ta bar. Oǵan ken ornyndaǵy keshendi tehnologııalyq jeli zaýytynyń qondyrǵy operatory mindetin atqarý júktelgen. Ken ornynda jumys istegenine bes jyldan asypty. Ken orny ornalasqan Jylyoı aýdanynda týyp-ósken ol bastapqyda merdigerlik kompanııaǵa jumysqa ornalasqan. Keıin «Teńizshevroıl» JShS-nyń zaýytynda jumys isteýge bet burǵan.
«Kindik qanym tamǵan aýylym buryn Eski Qaraton dep atalǵan. Aýylymyz 2000-jyldary «Teńizshevroıldyń» qarjylaı qoldaýymen Jylyoı aýdanynyń ortalyǵy – Qulsary qalasyna taıaý mańǵa kóshirildi. Bala kezimnen «Teńiz» ken orny, onda jumys isteıtin munaıshylaryń jumysy týraly kóp estidim. Ken ornynda jumys istesem ǵoı dep armandaýshy edim. Sol maqsatym oryndalyp, elimizdegi eń iri kompanııada eńbek etip júrmin», deıdi Baýyrjan. Onyń aıtýynsha, ken ornyndaǵy jumysqa ornalasý úshin aldymen Almatyda bilim jetildirgen. Sodan soń ózge mamandarmen birge irikteýden ótken.
«Joǵary oqý ornyn bitirgen mamanǵa birden jumys tabý ońaı emes. «Jumysqa kirý úshin tanys kerek. Aqsha bermeseń, jumysqa almaıdy», degen qańqý sózderdi jıi estımiz. Biraq úmit úzbegen, talpynǵan janǵa mundaı bos sóz áser etpeıdi. Ras, jetistikke qol jetkizý birden múmkin bola qoımaıtyn shyǵar. Jas mamanǵa aldymen tájirıbe jınaqtaý qajet. Men de sondaı joldan ótý úshin jumysymdy merdiger kompanııalarda bastaýdy jón kórdim. О́ıtkeni ken ornyndaǵy ár jumystyń jaýapkershiligi bar. Qatelikke urynbaý úshin biliktilikti shyńdaý kerek. Qazir meniń ómirimde «TShO-ǵa deıin» jáne «TShO-dan keıin» degen kezeń bar. Jumysym ózime unaıdy. Kompanııanyń áleýmettik paketimen Atyraý qalasynan úı satyp aldym», deıdi B.Daıyshqalıev.
Orda buzatyn otyz jasqa qadam basqan jigittiń jumys kúni aýysymdy qabyldaýdan bastalady. Basshylar ótkizetin jıynǵa qatysyp, atqarylar jumysty pysyqtap alady. Sodan keıin ǵana 200-qondyrǵynyń jumys úderisin tekseredi. Bul qondyrǵyda munaı quramy sý men kúkirtten tazartylady. Sol sebepten, qaýipsizdik máselesine basa mán beriledi.
«Ár adam bárin bilip týmaıdy ǵoı. Jumys úderisine oraı bilimin, kásibı biliktiligin jetildirýi qıyn emes. Jaýapkershilikti sezingen, izdenis pen adaldyq qaǵıdatyn ustanǵan adam ǵana maqsatyna jetedi. Meniń endigi maqsatym – búgingi deńgeıde qalmaı, aǵylshyn tilin meńgerýdi jetildirip, kompanııanyń sheteldegi tájirıbe almasý baǵdarlamasy arqyly biliktiligimdi odan ári shyńdaý. Bul úshin barlyq múmkindik bar. AQSh-qa baryp, bilimin shyńdap kelgen áriptesterim az emes», dedi ol.
Qaırat Jańaev ta «Teńiz» ken ornynda operator bolyp jumys isteıdi. Ol da – Jylyoı aýdanynyń týmasy. Munaı-gaz salasyndaǵy kásibin qazirgi «Jylyoımunaıgaz» basqarmasynda burǵylaýshylyqtan bastaǵan ákesi Ertileýdiń jolyn jalǵastyrýdy kózdepti.
«Munaıshy bolýyma týǵan aýylymnyń Munaıly degen ataýy áser etti dep oılaımyn. Onyń ústine ákem munaı-gaz salasynda 30 jyl jumys istedi. Ákemniń munaıshylyq kásibin jalǵastyrý úshin mektepte úzdik oqýǵa talpyndym. Sóıtip, 2012 jyly gımnazııany «Altyn belgimen» bitirgen soń Q.Sátbaev atyndaǵy qazaq ulttyq tehnıkalyq ýnıversıtetine oqýǵa tústim. Munda «Munaı-gaz isi» mamandyǵy boıynsha joǵary bilim aldym», deıdi Qaırat.
Jas maman «Teńiz» ken ornyndaǵy óndiriste bos jumys oryndary ashylǵanyn ınternet jelisinen kórgen. Sóıtip, kompanııanyń resmı saıtyna túıindemesin joldapty. Kompanııanyń «Adam resýrstaryn basqarý» bólimindegi áńgimelesý men testileýden ótip, jumysqa shaqyrtý alǵan.
«Tehnologııalyq qondyrǵy operatory qyzmetin 2020 jyly bastaǵan edim. Qazir DMK qondyrǵysynda operator mindetin atqaryp júrmin. Árıne, úsh jyldyq eńbek ótili kóp emes. Biraq soǵan qaramastan, munda ózimniń jáne áriptesterimniń qaýipsizdigine qamqor bolýdy úırendim. О́ıtkeni eńbek qaýipsizdigin saqtamaı, alǵa bir qadam attaý múmkin emes», deıdi Q.Jańaev.
Ol aýysymaralyq demalysyn shetelde emes, Qulsary qalasynda ótkizgendi qalaıdy. О́ıtkeni bul shaǵyn qalanyń ınfraqurylymy jaqsaryp keledi. Munda kompanııanyń qoldaýymen ortalyq stadıon, aýrýhana, balabaqsha sekildi áleýmettik nysandar boı kótergen.
«Ken ornynda jumys isteıtin barlyq qyzmetker bir úlken otbasynyń múshesi sekildi. Baýyryna kómekteskendeı, bir-birine qol ushyn sozýǵa umtylyp turady. Jumystyń qaýipsiz atqarylǵanyn ortaq ıgilik dep túsinedi», degen oıymen bólisti jas maman.
Atyraý oblysy
