«Orta Qaqpaq» sý elektr stansasy jylyna 13 mln kVt elektr qýatyn óndiredi. Mundaǵy sý qubyrynyń uzyndyǵy – 4 shaqyrym. «Qaınar» qosalqy stansasyna uzyndyǵy 12 shaqyrym bolatyn 10 kVt-tyq jeli tartylǵan. О́ndirilgen qýat kózi sol arqyly taratýshy kompanııaǵa jetkizilip, odan ári tutynýshylarǵa beriledi.
«Bizdiń oblys jel, kún, sý sııaqty balamaly energetıka óndirýge óte yńǵaıly. Sol sebepten ony damytýǵa tıistimiz. Onyń ekologııaǵa da, turǵyndarǵa da paıdasy men tıimdiligi zor», dedi ashylý saltanatyna qatysqan oblys ákimi Marat Sultanǵazıev.
Jobany júzege asyrý barysynda 45 adam jumyspen qamtamasyz etilse, endi avtomatty túrde basqarylatyn zamanaýı sý elektr stansasynda tórt jergilikti turǵyn turaqty jumys isteıdi.
«Almaty oblysynyń damýyna óz úlesimdi qosqanyma óte qýanyshtymyn jáne bizdiń ınvestısııalar óńir halqynyń turmysy men ekonomıkasyna qyrýar paıdasyn tıgizedi dep úmittenemin. Joba bastapqyda 1,2 mlrd teńgege baǵalanǵanyna qaramastan, ınflıasııaǵa baılanysty quny 1,5 mlrd-qa deıin ósti. Biz ózimizge júktelgen mindetterdi sátti oryndadyq. Qýattylyǵy jylyna 13 mıllıon kVt/saǵ bolatyn joba tutynýshylardy turaqty energııamen qamtamasyz etýge múmkindik beredi. Onyń ústine stansanyń qýaty sý deńgeıiniń ózgerýine beıimdeledi», dedi jobanyń ınvestory ári jetekshisi Januzaq Qonaev.
Iske qosylǵan sý elektr stansasynyń qurylysyn «Bıznestiń jol kartasy» memlekettik baǵdarlamasy aıasynda «Damu» ınvestısııalyq qorynyń qoldaýymen osy jobaǵa qatysýshy «Tekes Energy» JShS qarjylandyrdy.
Almaty oblysy
