Bıyl 8 qyrkúıekte Astanada V Dúnıejúzilik kóshpeliler oıyndarynyń alaýy tutanatyny belgili. Jaýapty jarysqa tyńǵylyqty daıarlaný maqsatynda atalǵan federasııanyń músheleri daıyndyq jumystaryn Alataý baýraıynda ótkizýdi jón kórgen eken. Qazirgi kezde Armııashylardyń ortalyq sport klýbynyń (AOSK) bazasynda 37 sportshy sheberlikterin shyńdap jatyr. Olardyń 20-sy – asyqshy jigitter, al 11-i – besasyqshy qyzdar.
– Alǵashqy oqý-jattyǵý jıynymyz sátti ótip jatyr, – dep bastady óz áńgimesin Qazaqstan ulttyq quramasynyń bas bapkeri Jomart Sabyrjanuly. – Ásem shahar Almatyda esh alańsyz daıarlanýymyzǵa barlyq jaǵdaı jasaldy. Aldymyzda áli Shymkent pen Kókshetaý qalalary jáne Qyrǵyzstannyń Sholpan-Atasy men Túrkııanyń Antalııasynda ótetin tórt jıyn bar. Dúnıejúzilik kóshpeliler oıyndarynda quramamyz el namysyn abyroımen qorǵap, asyq atý men bes asyqtan top jarady dep senemiz. Dúbirli dodada qyrǵyzdyń ordo oıynynan da saıysqa túsemiz. Sondyqtan Sholpan-Ataǵa sapar shekkende qyrǵyzdardyń tól óneriniń qyr-syryna ábden qanyǵýdy kózdep otyrmyz.
Asyq atýdan Pavlodar oblysynyń aǵa jattyqtyrýshysy, álem jáne Eýrazııa kýboginiń jeńimpazy, «Altyn tuǵyr» ıegeri Qalıbek Qýanuly kún ótken saıyn qurama músheleriniń sheberlikteri shyńdalyp kele jatqanyn aıtty.
– Daıyndyǵymyz jaqsy. Jerlesterimizdiń arasynan bas júldeden úmitker myna sportshy dep eshkimdi bóle-jara ataǵym kelmeıdi. Báriniń deńgeıi birdeı. Eń bastysy, olardyń fızıkalyq daıyndyqtaryn psıhologııalyq turǵydan da pysyqtaý jumystary júrgizilip jatyr. Maqsatymyz – Álem kýbogi, álem jáne Azııa chempıonaty jáne Kóshpeliler oıyndarynda úzdikter qatarynan kóriný, – deıdi ol.
Dúbirli dodaǵa daıyndyqtaryn pysyqtap jatqandardyń qatarynda Aqmola oblysynan kelgen besasyqshy Kógershin Dýman da bar. Ol – Kókshetaýdaǵy joǵary medısınalyq kolledjiniń tórtinshi kýrs stýdenti. Kógershinniń bes asyqpen aınalysqanyna bes jyl boldy. Sol aralyqta qazaq qyzy Álem jáne Qazaqstan kýboginiń ıegeri, Eýrazııa kýboginiń kúmis júldegeri atanyp úlgerdi. Ol óz bolashaǵyn ulttyq sportpen baılanystyryp, sporttyq mansabyn aıaqtaǵannan keıin bapker bolýdy kózdep otyr.
Alataý baýraıynda ótip jatqan oqý-jattyǵý jıynynyń qorytyndysy boıynsha aldaǵy ýaqytta ótetin halyqaralyq jarystarda el namysyn qorǵaıtyn asyqshylar anyqtalady.
Eske sala keteıik, respýblıkalyq «Asyq atý» federasııasy Ulttyq sport qaýymdastyǵynyń quramyna kiredi. Qaýymdastyq quramynda budan ózge «Báıge», «Kókpar», «Aýdaryspaq», «Sadaq atý», «Jamby atý», «Qusbegilik», «Toǵyzqumalaq», «Teńge ilý», «JORYQ» at sporty federasııalary bar.
