Freedom Life О́SK mamandarynyń aıtýynsha, keı elden óndiristegi jazataıym oqıǵalardan saqtandyrý medısınalyq saqtandyrýmen úılestirilgen, biraz elde korporatıvtik saqtandyrý jańadan paıda bolǵan jáne damý kezeńinde. Máselen, AQSh óndirisinde 2022 jyly 4,5 mln-ǵa jýyq jaraqat pen aýrý jaǵdaıy tirkelipti. Jumys berýshiler óndiristegi jazataıym oqıǵalardan mindetti saqtandyrý baǵdarlamasynan basqa, qyzmetkerlerdiń densaýlyq ahýalyn anyqtaýǵa jáne sozylmaly aýrýlaryn emdeýge kómektesetin baǵdarlamalaryn qoldanady. Atalǵan baǵdarlamalar densaýlyq táýekelin baǵalaýdy, bıometrııalyq skrınıng jáne densaýlyqty nyǵaıtý baǵdarlamalaryn qamtıdy.
Qytaıda 2021 jyly tek 354 mln adam qyzmetkerlerdi áleýmettik saqtandyrý baǵdarlamasyna qatysqan. О́ndiriste jaraqattanǵan nemese kásibı aýrýǵa shaldyqqan qyzmetkerler tolyq eńbekaqy alýǵa jáne emdelý kezeńinde aı saıyn tólenetin jeńildikterdi paıdalanýǵa quqyly. Áleýmettik saqtandyrý medısınalyq, saýyqtyrý jáne tamaqtaný shyǵyndaryn óteıdi.
Fransııada eńbekke ornalastyrylǵan halyqtyń 96 paıyzy qyzmetkerdi mindetti saqtandyrý polısin ıelengen. Qyzmetkerler úshin jumystaǵy saqtandyrý jaǵdaılaryn qamtý, sonyń ishinde, medısınalyq qyzmet kórsetý boıynsha keń aýqymdy qamtýlar usynylady. Jeńil jaraqattar nemese aýrý kezinde, pasıentterge emdelý jáne qalpyna kelý shyǵyndary 70 paıyzǵa deıin qaıtarylady. Densaýlyǵy aýyr jaǵdaılarda shyǵyndary 100 paıyz óteledi.
«Birikken Arab Ámirliginde qyzmetkerlerdi saqtandyrý jaqynda paıda boldy. Buryn kompanııalar árbir jaldaǵan qyzmetkeri boıynsha bank kepildemesin 3 myń dırham (366,2 myń teńge) kóleminde tóleıtin. 2022 jyldyń maýsymynan bastap zańnamaǵa ózgertýler engizildi. Atalǵan kepildeme ornyna jumys berýshilerge qyzmetkerlerdi saqtandyrý shartyn jasasý múmkindigi berildi (WPP Insurance). Al Ýrýgvaıda eńbekke qabiletti halyqtyń 90 paıyzynan astamy saqtandyrylǵan. Qyzmetkerlerdi áleýmettik qamtamasyz etý júıesi jıyntyq túrde qoldanylady jáne óndiristegi jazataıym oqıǵalardan saqtandyrý, jumyssyzdyqty saqtandyrý, medısınalyq saqtandyrýdy qamtıdy», delinedi zertteýde.
Al bizdegi Áleýmettik medısınalyq saqtandyrý qorynyń málimeti boıynsha, 2023 jyly Mindetti áleýmettik medısınalyq saqtandyrý baǵdarlamasyna sáıkes 16,6 mln adam saqtandyryldy. Qazirgi sátte qyzmetkerlerdi mindetti medısınalyq saqtandyrý mólsherlemesi eńbekaqy mólsheriniń 3 paıyzyn quraıdy. Atalǵan soma qyzmetkerdiń eńbekaqysynan shegerilmeıdi, ony jumys berýshi tóleıdi.
«Qyzmetkerdi eńbek (qyzmettik) mindetterin atqarý kezinde jazataıym oqıǵalardan mindetti saqtandyrý týraly» zańǵa sáıkes ár jumys berýshi óz qyzmetkerimen saqtandyrý shartyn jasasýy kerek. Saqtandyrý merzimi – 12 aı. Quny jeke belgilenedi jáne ekonomıkalyq qyzmet túri men jyldyq eńbekaqy tólem qoryna baılanysty.
Ulttyq bank statıstıkasyna sáıkes, qyzmetkerdi óndiristegi jazataıym oqıǵalardan mindetti saqtandyrý boıynsha 2023 jyly saqtandyrý syılyqaqysynyń kólemi 87 mlrd teńgeni quraǵan, bul 2022 jylmen salystyrǵanda 22,9 paıyzǵa artyq. 2023 jyly saqtandyrý jarnasynyń kólemi 14,9 mlrd teńge boldy (2022 jylmen salystyrǵanda, 145,7 paıyzǵa kóp).
