Foto: Ulttyq Ulannyń baspasóz qyzmeti
Dálirek aıtar bolsaq, 27 aqpanda saǵat 20:20 shamasynda «Saryarqa» aýdanynda qoǵamdyq tártipti saqtaý jónindegi patrýldik-bekettik qyzmetti atqarý kezinde Ulttyq ulannyń áskerı jasaǵyna bir áıel óziniń balasyn taba almaıtynyn aıtyp, kómekke júgindi.
Áskerı jasaq bastyǵy qatardaǵy jaýynger Georgıı Lebakın men qatardaǵy jaýyngerler Bekbolat Eskendir jáne Arsen Qazı bul oqıǵa týraly dereý patrýldik top bastyǵyna baıandap, jaqyn mańdaǵy jasaqtardy habardar etti.
Az ǵana ýaqyt ishinde áskerı jasaqtyń kómegimen tórt jasar balany taýyp, ony anasyna tapsyrdy. Qýanǵan ana ulandyqtardyń qyzmetine sáttilik tilep, olardyń jedel ári jaýapty áreketteri úshin alǵys bildirip, bólim komandıriniń atyna alǵys hat jazdy.
Ekinshi jaǵdaı sol kúni saǵat 20:30 shamasynda boldy. Áskerı jasaq bastyǵy qatardaǵy jaýynger Birjan Jaqsylyqov pen patrýldik qatardaǵy jaýyngerler Baqdáýlet Asylhan men Álisher Mahmet quramyndaǵy áskerı jasaq patrýldeý baǵytynda «IPhone 14» markaly smartfondy tapty. Bul jaǵdaı týraly baılanys quraldary arqyly áskerı jasaq bastyǵyna baıandaldy.
– Biz izdeýdi bastaǵannan keıin telefonǵa smartfon ıesinen qońyraý tústi. Keıin ol telefon tabylǵan jerge keldi. Áńgime barysynda biz smartfonnyń osy jas jigitke tıesili ekenine kóz jetkizip, ony ıesine qaıtardyq, – deıdi áskerı jasaq bastyǵy qatardaǵy jaýynger Birjan Jaqsylyqov.
Osydan keıin jas jigit sarbazdarǵa qyraǵy jáne adal qyzmet etkeni úshin alǵys aıtty.
