Búginde Ulttyq ýnıversıtet basshylyǵy stýdentterdiń ónertabystyq bastamalaryna turaqty qoldaý kórsetip keledi. Jańalyqqa jany qumar fakýltet dekany, zań ǵylymdarynyń kandıdaty, dosent Spataı Sartaev ónertabystyń zerthana deńgeıinde qalyp qoımaýyna mán berip, stýdentterdi ár kez jigerlendirip otyrady. Joba jetekshisi, dekannyń ǵylymı-ınnovasııalyq jumys jáne halyqaralyq baılanys jónindegi orynbasary, PhD Qanat Keldebekovtiń aıtýynsha, árbir ónertabys úlken izdeniske, saraptaý, zertteý jumystarymen tyǵyz baılanysty. «Fakýltetimizde qoǵamǵa paıdaly ári zamanaýı ıdeıalar toptamasy jasaqtalǵan. Bastysy, jas zertteýshiler tarapynan qulshynys bolsa bolǵany. Bizdiń zertteýlerimizge qaraǵanda, ázirge Myrzahan Erzat qurastyrǵan ámbebap asataıaqtyń balamasy joq. Stýdentimiz, ásirese robot tehnıkasy salasyna mashyqtanǵan. Aldaǵy ýaqytta da qoǵam suranysyna qajetti buıymdar qurastyryp shyǵaratynyna senim mol. Bul asataıaq qarttar men múmkindigi shekteýli jandarǵa asa qajetti qural. Álem pandemııadan keıin adam densaýlyǵynyń bárinen de mańyzdy ekenine kóz jetkizdi. Ásirese qoǵamda qarttar men múmkindigi shekteýli jandarǵa qamqorlyq kúsheıe tústi. Osy oraıda fakýltette jasalǵan baldaqtyń prototıpi zamanaýı jańashyldyǵymen erekshelenedi», deıdi Q.Keldebekov.
Qarapaıym materıaldardan qurastyrylǵan baldaqta GPS qondyrǵysy ornatylǵan. Serýenge shyqqanda qurylǵy arqyly baldaq ustaǵan adamnyń baǵytyn qadaǵalap otyrýǵa bolady. Abaısyzda qulap qalsa, jaqyndaryna dereý habarlama jetedi. Al baldaqqa ornatylǵan arnaıy lazerlik sham bógetterdi, kedergilerdi anyqtap, qart adamǵa dybystyq belgi berip otyrady. Baldaq qozǵalysty jeńildetip qana qoımaıdy, kóńil kúıdi de kóteredi. О́ıtkeni onda radıo qurylǵysy jumys isteıdi. Salmaǵy – 300-400 gramm, uzyndyǵy 1 metrge deıin sozylatyn baldaqtyń naryqtaǵy baǵasy kópshilikke qoljetimdi bolmaq.
«Derekter boıynsha dúnıe júzinde, ásirese Japonııa, Qytaı elderinde qarttar sany kóbeıip barady. Qartaıǵan saıyn qozǵalys úshin qosymsha saımandar da qajet ekeni anyq. Ásirese qart adamdar úshin baspaldaqtan túsip, shyǵý qıyndaıdy. Osylaısha, biz baspaldaqtan esh qıyndyqsyz kóterilýi úshin zamanaýı baldaq shyǵarýdy oılastyrdyq. Onyń alǵashqy úlgisinde temirdi qoldandyq. Endigi kezekte salmaǵyn jeńildetýge basqa da materıaldardy qarastyryp, ártúrli baspaldaqqa beıimdeýdi jobalap otyrmyz. Ýnıversıtet basshylyǵynyń qoldaýymen ónertabysty naryqqa shyǵarý da josparymyzda bar. Patent quqyǵy jobalanyp, aldaǵy josparlardy da talqylaý ústindemiz. Elimiz ǵana emes, halyqaralyq naryqqa ulttyq ónimder shyǵarý, qazaqy brendti damytý basty maqsat bolǵandyqtan, bul iske qulshynysymyz joǵary», deıdi ónertapqysh.
«Ǵylymdy ıgerip, jańalyq jaratsam» degen oı Myrzahan Erzatty kópten mazalap júrgen-di. Ol osy maqsatyna jetý úshin ulttyq ýnıversıtettiń Joǵary oqý ornyna deıingi bilim berý fakýltetine oqýǵa túsedi. Talapty jasqa qoldaý bildirgen ustazdary da onyń ıdeıalaryn turaqty qoldap keledi.
Bul ónertabys Myrzahan Erzattyń alǵashqy jobasy emes. 2018-2022 jyldarda Shyńjań ýnıversıtetinde mehanıkalyq ınjenerge mamandanǵan ol keıingi eki jylda Astana LRT qurylys jobasynda tehnıka salasynyń mamany bolyp isteıdi. Byltyr kúz aıynda Xinjian(Shenzhen)Technology Co., Ltd kompanııasyn ashyp, qoǵamǵa paıdaly kásip istesem dep aldyna úlken maqsat qoıady. Talapty jas buǵan deıin bıdaı túıýge arnalǵan elektrondy, muz qyratyn elektr mashınasyn, kótergish stend, qalalyq aýmaqtarda jerasty keshendi qubyrlarynda qoldanatyn qurylǵy, kókónis otyrǵyzyp, tamyr daqylyn sebetin jáne qurylysqa arnalǵan qurylǵy qurastyryp, patentin alǵan.
ALMATY
