Osy kezde qala irgesindegi Elek, Jińishke ózenderiniń jaǵalaýy bıiktetilip, kóshelerdegi jaýyn-shashyn sýlary jınalatyn aryqtardyń ishi qar men muzdan tazartylyp, qorǵanys bógetteri qalpyna keltirilip jatyr. Áıteke bı, Qobda, Oıyl aýdandaryndaǵy Tereńsaı, Taldysaı, Kósem, Qazan-2, Ekpetal bógetteri, Saraljyn, Qýyrdaqty, Qaraoı men Qaıyńdy aýylyndaǵy kópirler jóndeldi.
Aqtóbe oblystyq TJD málimetine qaraǵanda, kún jylynǵan mezgilden bastap sý tasqyny qaýpi bar ózenderdiń 16 shaqyrymynda birqatar jumys iske asyrylady. Sonyń ishinde eldi mekenderge jaqyn ózen jaǵalaýlaryn topyraq úıindilerimen bekitip, bes gıdrotehnıkalyq qurylys jóndelmekshi. Osy jyly avtokólik joldarynda eki kópir salynyp, alty kópirge kúrdeli jóndeý júrgiziledi.
«Oblys aýmaǵynda sý tasqynyna qarsy tıisti jumystardyń júrgizilgenine qaramastan, birqatar aýdanda erigen qar sýynyń avtokólik joldaryn buzyp ketýi, jol ústimen aǵýy jylda qaıtalanady. Máselen, Baıǵanın aýdanyndaǵy «Qaraýylkeldi – Altaı batyr – Mııaly», «Qaraýylkeldi – Ebeıti», Oıyl aýdanynda «Amangeldi – Kóptoǵaı», «Shalqar aýdanynda Shalqar – Shetyrǵyz» avtokólik joldaryn erigen qar sýy shaıyp ketken. Jol boıyndaǵy sý ótkizgish qurylǵylar durys bekitilmegendikten, qarǵyn sý ekpini ony buzyp ketedi. Sý tasqynynyń aldyn alý úshin kóshelerdegi qar shyǵarý jumysyn kúsheıtý kerek», deıdi oblystyq TJD bastyǵynyń orynbasary Aıbat Jańabergenov.
Qala tóńiregindegi Qurshysaı, Sadovyı, Eset batyr alaby, Saıa, Maǵadjan, Aqshat eldi mekenderin jylda sý basady. О́ıtkeni erigen qar sýlarynyń tabıǵı arnasyna úıler turǵyzylǵan. Máselen, jylda dalalyqtan aǵyp keletin qar sýy Qurshysaı aýylynyń shetine jınalady da, sol jerdegi jańa salynǵan úılerge kiredi. Byltyr kúzde osy jerdegi jınalǵan qar sýyn Jińishke ózenimen qosatyn aryq qazyldy. Saıa men Maǵadjan eldi mekenderiniń tusynda da Elek ózenine qaraı sý burý arnasy qosyldy.
Alaıda kóktemde arnasynan asyp jaıylyp, aǵyl-tegil bolyp jatatyn sýdyń shilde-tamyzdaǵy aptapta sharýashylyqqa qajet ekeni eske túsip, ustap qala almaǵanymyzǵa ókinemiz. Qarǵyn sýdy jınaý týraly qanshama ret usynys tússe de, jaqsy joba naqty iske aspaı keledi. Aldaǵy bes jylda elimizdiń ár óńirinde sý qoımalaryn salý jónindegi Úkimet tapsyrmasy iske assa, ekonomıkaǵa jan biteri anyq. Aqtóbe oblysynda da 2029 jylǵa deıin 22 sý qoımasyn salý josparlanyp otyr. Sonshama qoımany arnasy taıaz dalalyq ózen sýlarymen toltyra alar ma? Degenmen búginde jeti jobanyń tehnıkalyq-ekonomıkalyq negizdemesi ázir. Taıaý kúnderi jeti nysannyń memlekettik saraptama qorytyndysy shyǵyp, jobalyq-smetalyq qujattary bekitilse, qurylys jumystary bastalmaqshy.
Oblystyq tabıǵı resýrstar jáne jer qoınaýyn paıdalanýdy retteý basqarmasy basshysynyń mindetin atqarýshy Jomart Baqytkeldiulynyń aıtýynsha, Aqtóbe oblysynyń jerústi sýlary qoryn ulǵaıtý maqsatynda jasalatyn osy mańyzdy joba iske asyrylsa, qoımalarda 491,62 mln tekshe metr sý jınalyp, sýarmaly alqap aýdany 49 070 gektarǵa ulǵaıady. Qazirgi kezde ózender boıyndaǵy 206 gıdrotehnıkalyq qurylǵy ábden tozsa da, 611,8 mln tekshe metr sýdy ustap qalatyn shamasy bar. Aıta ketý kerek, Aqtóbe qalasynyń irgesindegi Qarǵaly, Aqtóbe, Sazdy sý qoımalaryna kóktemde qanshalyqty sý jınalary belgisiz. Byltyr kúzde osy qoımalardaǵy sý kólemi ortadan tómen bolatyn.
Aqtóbe oblysy
