Dúnıejúzilik zııatkerlik menshik uıymynyń qoldaýymen Ádilet mınıstrligi uıymdastyrǵan is-sharanyń basty maqsaty – turaqty damýdy ilgeriletýdegi geografııalyq kórsetkishterdiń erekshe rólin talqylaý. Semınarǵa DZMU, Eýropalyq Odaq, Ázerbaıjan, Ortalyq Azııa elderi, memlekettik organdar, ǵylymı jáne bilim berý mekemeleri, óndirýshiler men mamandar qatysty.
Ádilet mınıstri Azamat Esqaraev «geografııalyq kórsetkishter búkil álemde belgili bir óńirdiń taýarlary men qyzmetterdiń jáne agroónerkásiptik óńirlerdi damytýdyń ornyqtylyǵyn arttyrýdyń tıimdi quraly ekenin» atap ótti. Ol Túrkistan oblysy elimizdiń negizgi agrarlyq óńirleriniń biri retinde kóptegen geografııalyq kórsetkishti tirkeýde úlken áleýetke ıe ekenin de aıtty.
Is-sharaǵa DZMU brendteri sektorynyń Lıssabon tiziliminiń dırektory Aleksandra Grasıolı, Túrkistan oblysynyń ákimi Darhan Satybaldy qatysty. Májilis depýtaty Bolatbek Nájimetdınuly geografııalyq kórsetkishterdiń mańyzdylyǵyna toqtalyp, óndirýshiler, tutynýshylar jáne jalpy qoǵam úshin, onyń ishinde básekege qabilettilikti arttyrý, dástúrli bilim men mádenı murany saqtaý, týrızm men ekologııany damytýdaǵy artyqshylyqtaryn atap ótti.
ÁM Zııatkerlik menshik quqyqtary departamentiniń dırektory Sholpan Ábdireeva geografııalyq kórsetkishterdiń áleýmettik-ekonomıkalyq aspektileri týraly baıandady. Jıynǵa qatysýshylar zańnamadaǵy keıbir mańyzdy novellalar jáne olardy qoldaný tájirıbesi týraly pikirlerin ortaǵa saldy.
Semınardyń birinshi kúni geografııalyq kórsetkishterdi ulttyq deńgeıde tirkeý jáne paıdalaný tájirıbesine arnalsa, ekinshi kúni Ázerbaıjan men Ortalyq Azııa elderinde geografııalyq kórsetkishterdi paıdalanýdy quqyqtyq retteýdiń tujyrymdamalyq maqsattary men máseleleri qaraldy.
