«Búgin Jambyl aýdanynyń sporttyq ınfraqurylymy taǵy bir tamasha ǵımaratpen tolyǵyp otyr. Bul ǵımarat tek osy Qaraqastek aýylynda ǵana emes, aýdanda sporttyń damýyna jańa serpin beredi dep oılaımyn. Aýyl – naǵyz chempıondar mekeni. Tabıǵat aıasynda shymyr bolyp ósken balalar kez kelgen sportqa ıkemdi bolyp keledi. Sondyqtan aýyldy jerlerde sporttyq nysandar kóptep salynyp jatyr», degen oblys ákiminiń birinshi orynbasary Nurlan Ábdirahym turǵyndardy qýanyshymen quttyqtady.
Atalǵan sport keshenine bıýdjetten 719,7 mln teńge bólingen. Eńseli eki qabatty sport kesheniniń jalpy aýmaǵy 1509,8 sharshy metrdi quraıdy. Sport kesheninde boks, kúres zaldary, voleıbol, basketbol, fýtbol basqa da sport túrlerinen daıyndalýǵa bolatyn oıyn zaldary ornalasqan. Onda 14 jattyqtyrýshy 600-ge jýyq jasóspirimdi sportqa baýlymaq. Jańa ashylǵan sport keshenine irgeles Aqqaınar, Suranshy batyr, Besmoınaq, Úńgirtas, Beriktas, Aqterek aýyldarynyń jastary da kelip, jattyǵýyna múmkindik týdy.
Búginde aýdan boıynsha 232 sporttyq nysan jumys istep tur. Onyń ishinde 2 stadıon, 5 sport kesheni, 84 sport zal, 9 japsarlas sport zal, 1 ıppodrom, 2 júzý basseıni jáne 129 ártúrli sporttyq qurylym bar.
Sondaı-aq aýdanda balalar sportyn, buqaralyq sportty jáne sport ınfraqurylymyn damytý maqsatynda osy jyldyń aqpan aıynda «Jambyl aýdanynyń №2 balalar men jasóspirimder sport mektebi» kommýnaldyq memlekettik mekemesi quryldy. Qazirgi tańda aýdan aýmaǵynda jalpy 2 sport mektebi jasóspirimderdi sportqa baýlyp jatyr.
Buǵan qosa osy jyly Tarǵap aýylyna sport keshenin salýǵa qarjy bólý qarastyrylmaq. Sonymen qatar Úńgirtas aýylyna da sport nysanyn salý úshin jobalyq-smetalyq qujat ázirleý bastalǵan.
Almaty oblysy
