Foto: Úkimettiń baspasóz qyzmeti
Aýdany 7,2 myń sharshy metr bolatyn zamanaýı ortalyq balalardy sapaly qosymsha bilimmen qamtýdy keńeıtý maqsatynda salynyp jatyr. Atalǵan nysannyń qurylysyna 5,8 mlrd teńge kóleminde demeýshiler qarajaty tartyldy.
Balalar shyǵarmashylyǵy saraıy eń joǵary tehnologııalyq quraldarmen jabdyqtalatyn bolady. Munda ǵaryshtyq radıobaılanys klýby, robottehnıka stýdııasy, ónerkásiptik sáýlet jáne dızaın stýdııasy, ǵylymı-bıologııalyq zerthana, kovorkıng-aımaq, dybys jazý stýdııasy, fotografııa akademııasy, kórkem-estetıkalyq sheberhana, sportzal jáne taǵy basqa ashylady dep kózdelip otyr.
Búgingi tańda ǵımarattyń irgetasy quıylyp, eń astyńǵy qabat pen metall qurylymdar ornatyldy. Bıylǵy kúzde paıdalanýǵa berý josparlanǵan.
Premer-mınıstr ákimdikke jobanyń ýaqtyly iske qosylýyn qamtamasyz etýdi tapsyrdy.
«Bul – Memleket basshysynyń tikeleı tapsyrmasy boıynsha salynyp jatqan obekt, sondyqtan sapasy da óte joǵary deńgeıde bolýy kerek. Mundaı ortalyqtar balalardyń bos ýaqytyn qamtyp, olardyń shyǵarmashylyq qabiletterin damytýǵa, qosymsha bilim alýyna múmkindik beredi. Ortalyq iske qosylǵannan keıin qalada qosymsha bilimmen qamtý deńgeıi 70%-dy quramaq. Joba meniń jeke baqylaýymda bolady», dedi Oljas Bektenov.
Ekibastuz ákimi Aıan Beısekınniń aıtýynsha, búgingi tańda qalada 3 uıym qosymsha bilim berýmen aınalysady. Qamtý kórsetkishi shamamen 7 myń balany nemese 31%-dy quraıdy. Sondaı-aq jańa ortalyq erekshe bilim berý qajettilikteri bar balalarǵa beıimdelmek.
