Prezıdent aıtqandaı, máslıhattar halyqtyń máselesin sheshe alatyn kúshke aınalýǵa tıis. Ol úshin árbir depýtat belsendi bolyp, óńirge ınvestısııa tartý, jańa óndiris oryndaryn ashý jumystaryna atsalysýy qajet. Túrkistan oblysyndaǵy 337 depýtat osy jumystardy úılestirýge belsene qatyssa, jaqsy nátıjelerge jetemiz dep sanaımyn. Bul mindetterdi iske asyrýǵa bizde resýrs ta, múmkindik te bar. Eń bastysy – elimizde turaqtylyq pen tynyshtyq berik ornyqqan. Sondyqtan túrli geosaıası jaǵdaılar oryn alyp, álem qyrǵı-qabaq qatynastardyń eń qıyn kezeńderin bastan ótkerip otyrǵanda elimiz ınvestısııalar úshin tartymdy desek te bolady.
Memleket basshysy Úkimettiń keńeıtilgen otyrysynda negizgi kapıtalǵa salynǵan ınvestısııanyń ishki jalpy ónimge shaqqandaǵy úlesi azaıyp bara jatqanyn aıtyp ótti. «Bul kúrdeli jaǵdaı deýge bolady. Sebebi ekonomıkaǵa jetkilikti qarajat salynbaı jatyr. Sonyń saldarynan aldaǵy jyldary eldiń damý qarqynyn saqtap turýdyń ózi qıyn bolýy múmkin. Sondyqtan ishki jáne syrtqy ınvestısııany aıtarlyqtaı kóbeıtý kerek», dedi Prezıdent. Osy oraıda sheteldik ınvestısııalar tartý isinde belsendi áreket etip, ınvestorlar úshin neǵurlym ońtaıly jaǵdaılar jasaýǵa umtyla berýimiz kerek. Elimizge ınvestısııa kóp tartylsa, soǵurlym ekonomıkamyz damıtynyn esten shyǵarmaýymyz qajet. Sondaı-aq Memleket basshysy mindettegendeı ádiletti Qazaqstandy qurý úshin eń aldymen shaǵyn jáne orta bıznesti damytyp, óndiris oryndaryn ashýǵa óz úlesimizdi qosý – árqaısymyzdyń perzenttik paryzymyz. Árıne, bul bir kúndik sharýa emes, degenmen bilek túre kirisip, birligimiz ben yntymaǵymyzdy, tatýlyǵymyz ben turaqtylyǵymyzdy jáne ózara aýyzbirligimizdi kózdiń qarashyǵyndyı qasterlep, jumyla jumys istegende ǵana alǵa qoıǵan mereıli maqsattarǵa qol jetkizemiz.
Túrkistan oblystyq máslıhat depýtattary óńirdiń 17 qalasy men aýdanyn aralap, halyq aldynda esep berdi. Turǵyndardy mazalaıtyn máselelerdi tyńdap, ózekti máselelerdiń sheshilýine oń yqpal etý jáne atqarylǵan jumystar týraly aqparat berý maqsatyndaǵy kezdesýlerdi jergilikti turǵyndar joǵary baǵalap, quptaıtyndyqtaryn jetkizdi. Sonymen qatar turǵyndar ózderin mazalaıtyn máselelermen bólisti. Halyqty alańdatatyn máselelerdiń kóbi áleýmettik salaǵa qatysty. Iаǵnı mektep, sport alańy, mádenıet úıin, densaýlyq saqtaý mekemelerin salyp berýdi surady. Sondaı-aq aýyzsý, sapaly jol, jyldamdyǵy joǵary ınternet, elektr energııasy, tabıǵı gaz, jumyspen qamtý syndy máseleler alǵa tartyldy. Búginde árbir kezdesýde kóterilgen máselelerdiń barlyǵy hattamaǵa enip, tıisti usynystarmen memlekettik organdarǵa joldandy. Aldaǵy ýaqytta onyń oryndalýy turaqty baqylaýda bolady.
Kóptegen máseleniń sheshimi bıýdjetke kelip tireledi. Oblysymyzdyń 2024 jylǵy bıýdjeti 1 trıllıon 352 mıllıard teńgeni qurasa, sonyń 90 paıyzy respýblıkadan beriledi. Túrkistan oblysy dotasııaly aımaq bolǵandyqtan, kóp másele ortalyqtan qarjynyń bólinýine tikeleı baılanysty. Bul oraıda qosymsha kiris kózderin arttyrý maqsatynda óńdeý ónerkásibin damytý, ınvestısııa tartý, salyq kózderin tabý, zaýyt-fabrıkalar ashýǵa basymdyq berilip, túrli jobalar qolǵa alynǵan. Osy baǵytta óńirlik ınvestısııalyq shtab ınvestorlarmen tikeleı jumys júrgizip, oblys delegasııalary shetelderge baryp keldi. Bul jumystar óz jemisin bere bastady.
Nuraly ÁBIShOV,
Túrkistan oblystyq máslıhatynyń tóraǵasy
