Foto: gov.kz
Osynaý máselege Parlament depýtattary ne deıdi eken? Mundaı zańdy qabyldap jiberse, ne bolady? Al buǵan jeke kásipkerler ábden qarsy turýy múmkin. Sebebi jekeshelendirilgen jerlerinen aıyrylady.
Jyldan-jylǵa kóbeıe túsken avtokólikter megapolıs kóshelerine syımaı barady. Onsyz da kóligin qaıda qoıaryn bilmeı bas qatyryp, aqyly avtoturaqtar izdep júrgender jeterlik. Buǵan qosa tar kóshelerden oryn tappaı júrgen kólikter óz aldyna, eger qutqarý tehnıkalary, órt sóndirý, jedel járdem kórsetý, sý qubyrlarynyń jarylýy, joǵary voltti kabelderdi qazyp, jedel jóndeý, basqa da apattyq jaǵdaılarda tehnıka qalaı ótpek?
О́tken jyldyń jeltoqsanynda Úkimette ótken jıynda jyljymaıtyn múliktiń biryńǵaı memlekettik kadastryna qatysty komıssııanyń jumysy talqylandy. Sonda biraz kemshiliktiń beti ashyldy. Onda bólingen jer ýchaskeleriniń aıqyn kórinis tabýy, jer qoryna qatysty barlyq aqparatty azamattar erkin bilip otyrýy kerek ekeni aıtyldy. Saraptama taldaýlarynyń nátıjesinde ákimshilikter tarapynan sıfrlyq málimetter talapqa saı emesi anyqtaldy.
Al endi Almatyda qala joldaryn taryltý arqyly velojoldar salamyz degen jeleýmen urlyqty zańdastyrýǵa jol berýge bola ma? Eger bul usynys maquldansa, depýtattar tarapynan ondaı zań qabyldanyp ketse, demek bul burynǵy zańsyzdyqty jabýdyń jaqsy amaldary bolmaq. Aýdan, qala ákimderi, jeke kásipkerler úshin ondaı zańsyzdyqqa jol berýge bolmaıdy. Muny tıisti oryndar tekserýge tıis. Oǵan ınvestorlar da jol bere qoımas. О́ıtkeni olardyń qaraýyndaǵy jer aýmaǵy tarylyp ketedi.
Onsyz da jaz boıy Almatydaǵy taspadaı tartylǵan, esh kemshiligi joq, áp-ádemi keń dańǵyldardy qaıta qoparyp, qyrýar mıllıard shyǵyndalyp, keptelisti odan ári kóbeıtip, halyqtyń júıkesin juqartty emes pe? Áp-ádemi jıektastar aýystyrylyp, trotýarlar qıratylyp, qaıta tóseldi ǵoı. Endi kelip kólik júretin kósheni taryltsa, ne bolady? Osynyń bári depýtattardyń jiti nazarynda bolýy kerek dep oılaımyz.
Saıasat BEIISBAI,
Fılosofııa, saıasattaný jáne dintaný ınstıtýtynyń bas sarapshysy
