Shekarasyz mahabbat

Fılm «Káris kelin» dep atalady. Qurylǵanyna 3 jyl tolǵan «Turkistan» arnasynyń bul tyrnaqaldy tóltýyndysy ekenin de aıta ketelik. Komedııalyq melodrama janryndaǵy fılm shynaıy oqıǵalarǵa negizdelgen. Koreıada 5 jylǵa jýyq jumys istegen Sáken 2023 jyly elge ózimen birge súıiktisi Sýdjın Lıdi alyp kelip, qarashańyraǵyna kelin etip túsirgen. Búginde jas otbasy tatý-tátti ómir súrip jatyr. Fılm Sýdjın Lıdiń Qazaqstanǵa kelgen alǵashqy kúnderdegi basynan ótkizgen qyzyqty oqıǵalarynan bastaý alady. Onda eki jastyń mahabbaty ǵana emes, otbasy qundylyqtary, qazaq halqynyń salt-dástúrleri nasıhattalady. Mysaly, bir áýlettiń jalǵyz uly káris qyzyna úılenip, erteń elden ketip qalyp, shańyraqtyń oty sónip qala ma degen Sákenniń jaqyndarynyń ýaıymy, shekara asyp kelgen qyzdy betin ashpaı úıine kirgizip alǵan otbasyna aýyl aqsaqaldarynyń jınalyp kelip, aqyldaryn aıtýy syndy qazaqy tanymdar men mundalaıdy. Fılmniń ıdeıa avtory – «Turkistan Media Holding» JShS bas dırektory Janahmet Aǵybaev. Rejısseri – Sardor Rasýlov, ssenarııin tele­arna qyzmetkerleri birlese jazyp shyqqan. Rólderdi Túrkis­tan oblysy men Shymkent qala­synyń kásibı akterleri som­daǵan. Al basty keıipker Sáken men Sýdjınniń jáne Rozanyń róline koreı tilin jetik meń­ger­gen akterlerdi kastıng arqyly Almatydan shaqyrýǵa týra kelgen. Sákenniń rólin – Aslan Qaıypjan, Sýdjındi – Juldyz Murat, al Rozany Aıa Isabaeva somdaǵan. Úsheýiniń de akterlik jolyndaǵy bul alǵashqy fılm bolǵandyqtan kemshin tustaryna keshirimmen qaraýǵa bolatyn sekildi. Sýdjındi somdaǵan Juldyz Almatydaǵy Abylaı han atyndaǵy Qazaq halyqaralyq qatynastar jáne álem tilderi ýnıversıtetinde koreı-aǵylshyn tilderiniń aýdarmashysy maman­dyǵyn meńgerip júr. Túsirilim barysynda Sýdjınmen kezdesip, áńgime-dúken qurǵan Juldyz qıyndyq bolǵanyn jasyrmaıdy. Koreı tilinde sóıleý oǵan asa qıyndyq keltire qoımaǵan. Al Koreıadan Qazaqstanǵa mahabbaty úshin kelgen qyzdyń ishki sezimin buljytpaı berý úshin kóbirek eńbektenýine týra kelipti. Qıyndyqtarmen qatar qyzyqty sátter de bolǵan. Máselen, Jul­dyz túsirilim barysynda sıyr saýý este qalǵan eń qyzyqty sátterdiń biri bolǵanyn aıtady. Sáken men Sýdjın de túsirilim bary­synda bolǵan eken. Al Sáken­­niń ákesi Erlandy somdaǵan bel­gili ánshi, akter, kópshilikke «Túrkis­ta­nym turanym» ánimen de tanymal – Marat Orazmetov birtalaı fılm­ge túsken, ózindik kelbeti bar, zor daýys pen talant ıesi edi. Fılmdegi Erlan – Marat Oraz­me­tovtiń kıno álemin­degi eń sońǵy róli bol­dy. Týyn­dy­nyń túsirilimi qara­sha aıynda aıaq­tal­ǵan. Al akter jel­toq­san­nyń 7-si kúni jaryq dúnıemen qosh aıtys­ty.

Búginde shynaıy oqıǵa jelisi­men túsirilgen «Káris kelin» fılmi Túrkistan, Shymkent qala­larynyń kınoteatrlarynda kór­se­tilip jatyr. Tusaýkeserge kelgen kórermenniń qarasy qalyń. Kór­se­tilimnen soń fılm­ge joǵary baǵa bergender de, óz piki­rin bildirýshiler de boldy.­ «Ońtústik dese, oıymyzǵa aldy­men ázil-ospaq týyn­dylary kele qalatyny ras. Bul fılmniń de kome­dııalyq sahnalary jeter­lik. Odan bólek tanymal ázil­kesh­terdiń fılm­de oınaýy son­shalyqty sátti boldy dep aıta almaımyn. Fılmniń utqan tusy­nyń biri – Túrkistan óńiriniń kúzdik keı­pin, sulýlyǵyn ádemi bere alǵan. Tabı­ǵa­tyna qarap otyryp kóz sýarasyń. Qalaı bolǵanda da, telearnanyń alǵashqy ju­mysy – jap-jaqsy fılm. Eń bastysy, ara­da taý jatyr, muhıt jatyr, salt jatyr, sana jatyr demeı, birin-biri tapqan, mahab­baty bárin jeńgen ǵashyqtardyń shy­naıy oqıǵasyna eskertkish qalandy dep oılaımyn», deıdi kórermenderdiń biri, jas aqyn Sezim Mergenbaı.

Iá, jańa týyndynyń óz aıtary bar. Túlkibas aýdanynyń bir aýylynda jas otbasy adal mahabbatyn aıalap otyr. Sondaı-aq ózgeni de óz balasyndaı kóretin qazaq jurtynyń tálim-tárbıesiniń myqtylyǵy, qonaqjaılylyǵy fılmde baıqalady. Ár kúlkili sáttiń astarynan tárbıelik mándi ańǵarǵan kórermen qaýym joǵary baǵa berip jatyr. Túrkistan qalasy men Tólebı aýdanynda bar bolǵany 9 kúnde túsirilgen fılm kórermenderi kún sanap kóbeıe túskenin de aıta ketelik.

Túrkistan oblysy