Máselen, byltyr 25 jeltoqsanda 64 jastaǵy áıel keshki mezgilde ózenniń arǵy betine ótpek bolǵan. Alaıda muz oıylyp, zeınetker sýǵa túsip ketken. Aýdandyq polısııa bólimine túsken habardy estigen tárbıe jáne kadr bólimshesiniń ınspektory Roman Nasıhan jeke avtokóligimen oqıǵa ornyna jetken. Ol avtokóliginen arqan ákelip, muz ústine shyqqan sátte kómekke kelgen ózge er adam muz oıyǵyna túsip ketken.
Patrýldik polısııa bóliminiń qyzmetkerleri Artýr Kárimov, Nurhat Zulqarov, Ádilbek Temirbolat, Jandos Ibatýllaev, Amandyq Aıdynalıev pen ýchaskelik polısııa ınspektory Darhan Amanǵalıev oqıǵa ornyna jedel jetedi. Biraq juqa muz ústine bir mezette 10-ǵa jýyq adam shyqqandyqtan, muz oıyǵy úlkeıe túsken. Osyndaı qaýipke qaramastan, polıseıler ózenge qulaǵan áıel men er adamdy qutqaryp qalady.
Al bıyl 5 naýryzda dál osyǵan uqsas oqıǵa taǵy qaıtalandy. Bul joly 32 jastaǵy áıel Sharon ózeniniń ústimen ótýge bekingen. Sol kezde muz oıylyp, ózenge qulaǵan. Áıeldiń aıqaılap, kómek suraǵan daýsyn sol mańnan ótip bara jatqan aýdandyq polısııa bóliminiń patrýldik polısııa qyzmetiniń ınspektorlary, polısııa aǵa leıtenanttary Shyńtas Álısultan men Batyrjan Baqytuly estip, kómekke umtylǵan.
Polısııa qyzmetkerleri ózenge qulaǵan áıeldi jaǵaǵa alyp shyǵyp, oǵan sol sátte alǵashqy medısınalyq kómek kórsetedi. «Qazir aýa raıynyń jylynýyna baılanysty sý aıdyndaryndaǵy muz juqara bastady. Sol sebepten sý aıdyndarynyń jaǵalaýymen, jarqabaq pen jylǵalardyń ústimen ótýge bolmaıdy. О́ıtkeni juqa muz adam ómirine qaýipti. Osyǵan oraı ózenniń ústimen ótip, jol qysqartamyn deý ómirge óte qaýipti ekenin eskertemiz», dep habarlady polısııa departamentiniń baspasóz qyzmeti.
Atyraý oblysy
