«Elimizdegi barsha musylman qaýymdy qasıetti Ramazan aıynyń bastalýymen shyn júrekten quttyqtaımyn!
Bul – adamzatty izgilikke úndeıtin, sabyrlyqqa shaqyratyn jáne meıirimge bastaıtyn aı. Osy otyz kúnde keshirimdi bolý, qaıyrymdylyq tanytý, muqtaj jandarǵa kómek qolyn sozý sııaqty ıgilikti isterge basa mán beriledi.
Rýhanı kemeldenýge jol ashatyn bul aıda tatýlyq pen birliktiń, yrys pen yntymaqtyń jáne tynyshtyq pen turaqtylyqtyń da qadiri arta túsedi. Munyń bári Orazanyń máni men mańyzyn aıshyqtaıtyn qundylyqtar ekeni anyq.
Qasıetti aıdyń kelýimen quttyqtaı otyryp, ár otbasyna shattyq, bereke jáne amandyq tileımin!
Oraza qabyl bolsyn!», dep jazdy Máýlen Áshimbaev.
