Qazaq dalasynyń hosh ısi bar átirdi oılap tapqan ozyq oıly oqýshy Albına Aıdarhanova Aqmola oblysy Aqkól aýdanynyń Keńes aýylynda 5-synypta oqıdy. Ol bul jumysyn ustazy, bastaýysh synyp muǵalimi Jupar Ahmetovamen birge jasaǵan. Mektep oqýshysy átir ıisin shyǵarý úshin zerdeleý jumystaryn júrgizgenin aıtady.
«Beıbarys sultan týraly ańyzdaǵy «Jýsanda týǵan jerdiń ısi bar» degen sózdi estigende shabyttanyp kettim. Osyndaı sózdi estigennen keıin týǵan jerdiń ısi bar átirdi jasap shyǵarǵym keldi. Bul ıisti shyǵarýda men ejelgi shyǵý tegimizdi zerdeledim», deıdi Albına Aıdarhanova. Osylaısha, oqýshy óz jumysynda tabıǵı qospalardy paıdalanǵan. Al nátıjesinde parfıýmerııa jasaýdaǵy negizgi ónim týǵan ólkeniń qasıetti juparyna aınalǵan qarapaıym jýsan boldy.
Joba jetekshisi, bastaýysh synyp muǵalimi Jupar Ahmetova ıissýdyń densaýlyqqa paıdaly ekenine toqtalyp: «Biz úı jaǵdaıynda átir jasaý tásilderin zerttedik. Alǵan bilimimizdi tájirıbede qoldaný barysynda jýsannyń san túrin anyqtadyq. Kóbine átir jasaýǵa negizinen gúlder qoldanylady ǵoı, biz onyń ornyna qarapaıym jýsandy tańdadyq. Sebebi onyń tunbasy tábetti jaqsartady, asqazan-ishek joldarynyń qyzmetin nyǵaıtady, júıke júıesin tynyshtandyrady, túrli shanshý men qurysýlardy, aýyrsynýdy basady, tipti tynysh uıqyǵa septigin tıgizedi», dep túsindirdi.
Avtorlar bul hosh ıiske «Elim-aı» dep aıdar taǵypty. Jas ónertapqyshtyń aıtýynsha, átirdiń ataýy elimizdiń mádenıetine degen súıispenshilikpen baılanysty. Ozat oqýshy A.Aıdanhanova jaqynda ótken ǵylymı jobalar baıqaýynda óz jumysyn qorǵap, «Hımııa, bıologııa» seksııasynda úshinshi oryndy ıelendi.
