Jaqynda Atyraýdaǵy Abaı ortalyǵyndaǵy kezdesýde aqyn shyǵarmashylyǵyndaǵy qundylyqtar úndestigi atap ótildi. Aqyn óleńderiniń astarynan ar aldyndaǵy adaldyqtyń moraldyq-etıkalyq ıdealyn uǵynýǵa bolady. Al mahabbat pen dostyqqa, meıirimdilikke úndeıtin óleńderi oqyrmanyn adamgershilik bolmystan aınymaýǵa, adaldyqqa jeteleıdi.
Kezdesýde aqyn Muhtar Shahanov ultty saqtaýdyń basty sharty – til men dástúrge qatysty oıymen bólisti. Onyń pikirinshe, poezııanyń basty ustanymy – buryn eshkim aıtpaǵan sózdi oqyrmanǵa jetkizý.
«Meniń sheshem 13 balany dúnıege ákeldi. Biraq menen basqasy sábı kezinde túrli aýrýdan qaıtys boldy. «Meniń úsh ulym bar. Úlkeni – Shámshi, ekinshisi – Tólegen jáne kenjesi Muhtar», dep otyratyn edi sheshem. Shámshi Qaldaıaqov pen Tólegen Aıbergenov ult rýhanııatyna ólsheýsiz úles qosty. Shámshimen birge el-jurtqa tanymal bolǵan 16 án jazdyq», dedi M.Shahanov.
Aqynnyń dosy az. Onyń ishinde ózge ulttyń ókilderi de bar. Sonyń biri – qazaqty óz ultyndaı qurmet tutqan qyrǵyz jazýshysy Shyńǵys Aıtmatov. Al belgili dramatýrg, jazýshy Rahymjan Otarbaev aqyndy rýhanııattyń beldi ókili retinde syılaıtyn edi.
«Qazaq jeriniń ár óńiri maǵan qymbat, onyń ishinde Atyraýdy da júregimde saqtap júremin. Budan 30 jyl buryn jumyssyz qalǵanymda, atyraýlyq dosym Orynbasar Erkinovtiń úıinde alty aı turdym. Dosym shyǵarmashylyǵymdy toqtatpaýyma bar múmkindikti jasady. Onyń úıinde kóptegen óleń jazdym», deıdi aqyn.
Onyń shyǵarmalaryn tek aǵa býyn ǵana emes, jastar da qyzyǵýshylyqpen oqıdy. Máselen, erli-zaıypty Dýlat pen Nazerke Hamzınder aqynnyń lırıkalyq shyǵarmasyna oraılastyrylǵan «Mahabbatty qorǵaý» qoıylymyn usyndy.
«Ekeýmiz de – Muhtar aǵanyń oqyrmanymyz. Biz aqynnyń poezııa keshinde tanysqanbyz. Sol sebepten mundaı kezdesýdi qalt jibermeımiz. Búgingi kezdesýge aqyn týyndysynan qoıylym ázirledik», deıdi Dýlat Hamzın.
Al Janbolat esimdi taǵy bir oqyrman – tehnıka salasyndaǵy mamandyqtyń ıesi. Muhtar Shahanovtyń poezııasyn oqıdy. Ol kezdesýge ulyn erte kelipti.
«Poezııasyn jaqsy kóretin Muhtar Shahanovtyń Atyraýǵa kelgenin kezdeısoq bildim. Ulymnyń muǵalimi WhatsApp jelisindegi statýsynda osyndaı jańalyqpen bólisken eken. Aqynnyń óleńderin tyńdaý úshin keldim. Otbasylyq kitaphanamyzda saqtalǵan jyr kitabyna qoltańbasyn aldym», deıdi ol.
Jergilikti oqyrmandar aqynnyń qoltańbasyn aldy. Estelik sýretke tústi. Al aqyn adaldyq pen dostyq, mahabbat pen meıirimdilik haqynda pikir bildirdi. «Ár adamnyń aınasy – adaldyq. Dos-jaran men aǵaıynǵa, Otan men kásipke adaldyqtyń jóni bólek. Eń bastysy, ar aldyndaǵy adaldyqtan aınymaǵan jón», dedi aqyn.
Atyraý oblysy
