Uıymdastyrýshylar keltirgen derekke sensek, jármeńkege júzge jýyq qoldan toqylǵan sómkeler qoıylypty. Is-sharaǵa arnaıy kelgen qonaqtardyń aıtýynsha, estetıkalyq talǵammen toqylǵan buıymdardyń sapasy joǵary eken.
«Az ǵana ýaqyttyń ishinde jas-óspirimderdiń tamasha buıymdar toqyp úırengeni kóńil kónshitedi. Monshaqpen jumys isteýge ábden daǵdylanǵanyn, olardyń qolǵa alǵan jumystarynyń sapasynan aıqyn ańǵarýǵa bolady. Jármeńkege kelgendermen birge biz de oqýshylardyń ónerine qyzyǵyp, jumystaryna rıza bolyp turmyz», deıdi kelýshilerdiń biri Ǵalııa Dúısenbekova.
Qyryqtan astam úıirme qatysýshysy óz buıymdaryn usynǵan jármeńke jumysyn óńir basshysy Erbol Qarashókeev joǵary baǵalap, bilim alýshylardyń talaby men talantyna rıza boldy.
«Bizdiń ortalyqta az jumys atqarylyp jatqan joq. Al «Anama syı» jármeńkesin uıymdastyrýdaǵy basty maqsat – jasóspirimderdiń anaǵa degen perzenttik boryshy men mahabbatyn sezindirý. Sol maqsattyń údesinen shyǵý úshin qatysýshylarymyz aıanyp qalǵan joq. Túrli úlgide toqylǵan týyndysyn jármeńkege shyǵardy. Kelýshiler tarapynan joǵary baǵalanyp jatqanyn da kórdik. Qyzdardyń eńbegine qyzyǵyp, sómkelerdi satyp alǵandar da boldy», deıdi «Anaǵa taǵzym» ortalyǵynyń basshysy E.Myrzaǵalı.
TARAZ
