Amal merekesi jyldaǵy dástúrge sáıkes halyqaralyq dárejede toılanady. Otpan taýda 40-tan astam kıiz úı tigilip, túrli konserttik, sporttyq is-sharalar ótkiziledi.
Bul týraly Qoǵamdyq kommýnıkasııa ortalyǵynda ótken brıfıngte Mańǵystaý oblystyq mádenıet, arhıvter jáne qujattama basqarmasynyń bólim basshysy Ásem Áshirova málimdedi. Amal merekesine QR Prezıdenti ákimshiliginiń, Mádenıet jáne aqparat mınıstrliginiń ókilderi, Astana, Almaty, Shymkent qalalary men óńirlerdegi ákimdik ókilderi jáne Túrik elinen jyrshy Irfan Gerdal, О́zbekstannan Mýhammad Eshboev, Qaraqalpaqstannan Salamat Aıapov shaqyrylyp otyr.
13 naýryz kúni «Otpan» tarıhı-mádenı kesheniniń Jyńǵyldy aýyldyq atshabarynda at báıgeleri, qyz qýý, tazy júgirtý sııaqty ulttyq sport oıyndary ótkizilip, keıin «Aqsaraı» mýzeı kesheni tanystyrylady. Merekelik dýman ári qaraı Mańǵystaý aýdanyndaǵy ónerpazdardyń konserttik baǵdarlamasymen jalǵasyn tabady. Oǵan qosa «Qarashańyraq» alańyndaǵy sahnada teatrlandyrylǵan qoıylym kórsetilip, Qazaqstannyń Halyq ártisi Roza Rymbaeva, ánshi Álı Oqapov, Mádı Rymbaev óner kórsetedi. Odan bólek Túrkııa, О́zbekstan, Qaraqalpaqstannan arnaıy kelgen jyrshylardyń jáne oblys ónerpazdarynyń merekelik konserti ótpek.
Sondaı-aq «Qarashańyraq» ǵımaraty sahnasynda «Birlik Otyn» jaǵý rásimi, keshki qonaqasy, aýyzashar dastarhany jaıylady. Merekelik is-shara Túrkııa, О́zbekstan, Qaraqalpaqstan elderinen kelgen jyrshylar jáne oblys jyrshylarynyń qatysýymen jyr keshine, óńirlik jazba aqyndar músháırasyna ulasady.
Merekelik toı-dýmannyń ekinshi kúni 14 naýryzda Otpan tarıhı-mádenı kesheninde Túpqaraǵan, Qaraqııa, Munaıly aýdandary men Jańaózen qalasy ónerpazdarynyń konserttik baǵdarlamasy josparlanǵan. Budan bólek qazaq kúresi, túıe palýan sııaqty ulttyq sport saıysy uıymdastyrylyp, «Sálem — sózdiń atasy» jáne «Qaraqazannan dám tatý» merekelik is-sharalary, «Tusaýyńdy keseıin, kúrmeýińdi shesheıin» atty tanymal tulǵalardyń sábıleriniń tusaýyn kesý rásimi ótedi. Otpandaǵy merekelik is-shara Muńal ata urpaqtarynyń «Birlik Otyn» Qosaı ata urpaqtaryna tabystaý rásimimen qorytyndylanady.
«Sonymen qatar qala, aýdandarda «Nur Naýryz - halyq toıy» atty baýyrsaq party, naýryz kóje jármeńkesi, «Abysyn tatý bolsa» aýdandyq abysyndar baıqaýy, «Jyrdyń basy – áz Naýryz» atty jyr keshi, «Kelinder baıqaýy -2024», «As adamnyń qýaty» atty ulttyq taǵamdardan jármeńke, «Nur sebele, Ulystyń uly kúni» atty qazaqtyń ulttyq oıyndarynan saıys ótkiziledi», dedi Ásem Áshirova sózin jalǵap.
Amal merekesi 14 naýryz keshki saǵat 19:00-de Aqtaý qalasyndaǵy Amfıteatr sahnasynda Roza Rymbaeva, ánshi Álı Oqapov, Mádı Rymbaev jáne Mańǵystaý óner juldyzdarynyń konsertimen aıaqtalady.
