AQSh-tyń Kolýmbııa ýnıversıtetinde qazaq mýzykasynyń keshi ótti. Is-sharany uıymdastyrýǵa ýnıversıtettiń aǵa oqytýshysy Knar Abrahamıan muryndyq bolǵan. Qazaq halyq ánderin bes jyldan beri zerttep júrgen jas ǵalymnyń aıtýynsha, halyq ánderi áli kúnge keńestik nusqada oryndalyp júr. Knar hanym Úkili Ybyraıdyń «Gákkýiniń» bastapqy túpnusqasyn kórermenge tanystyryp, yrǵaǵy men áýeziniń ózgesheligin aıtty.
– Halyq keń tanylǵan ánderdiń kóbine keńestik operalyq nusqalaryn biledi. Biraq ókinishke qaraı, ánderdiń bastapqy kúıinen qalaı ózgergenin bilmeıdi. Árıne, etnografııalyq kitaptar bolǵanymen, shyn máninde, bul taqyryp ıgerilmeı jatyr. Sondyqtan kómeskilengen tolyq nusqasyn jańǵyrtyp, tanystyrsa, mádenı jadqa jaqsy bolar edi. Qazaqtyń ǵasyrlar boıy qalyptasqan mýzykasyn keńestik ıdeologııa burmalaǵanyn budan buryn batysta múldem qarastyrmaǵan, – deıdi zertteýshi Knar Abrahamıan.
Mádenı keshke jınalǵan amerıkalyqtardyń kóbi qazaq dombyrasynyń kúmbirlegen qońyr únin alǵash ret estip, tańdaı qaǵysqan. Harrıman ınstıtýtynyń dırektory, Valentına Izmırlıeva óz sózinde:
– Dombyra únin buǵan deıin eshqashan estigen emespin. Bul óte keremet eken. Men mýzykalyq áralýandyqty jaqsy kóremin. Keńes odaǵynyń eldiń ulttyq mýzykasyn burmalaǵanyn, ony qazaq halqyna qarsy qarý retinde qoldanǵanyn estip, kóńilimiz tústi. Degenmen qazir ǵalymdardyń osy úrdisti ózgertip, mýzykanyń shynaıy mánin qaıtadan ashyp jatqanyna óte qýanyshtymyn, – dep aqjarma pikirin bildirdi.
Aıta keteıik, Kolýmbııa ýnıversıtetiniń postkeńestik keńistikti zertteıtin Harrıman ınstıtýty qazaq mádenıetin tanýǵa baılanysty tek ǵylymı eńbektermen ǵana shektelmegen. Onda qazaq tarıhy men saıasatynan dárister berilip, qazaq tilin úıretetin kýrs ashý josparlanyp otyr.
