12 naýryz...
Almatynyń aq tańy qaıǵyryp oıandy.
О́mirden Jumabaı Shashtaıuly ótti... Qazaq kórkemsózi men kósemsózdiń eren júırigi ótti...
Sonaý ótken ǵasyrdyń sekseninshi jyldary «Qyzyl qar» atty alǵashqy povesimen ádebıet bosaǵasyn attar-attamastan, bıliktiń qyryna kelip, synǵa ushyraǵan jap-jas qalamgerdiń ózin kórmeı jatyp, áýeli atyn estigen kez esime tústi... Qudaı-aý! At arqasy qııanda jatqan malshy ómiriniń shyndyǵyn jazǵany úshin Ortalyq komıtettiń áńgir taıaǵyna ilikken jigitti bárimiz de kórgimiz keldi... «Qyzyl qar» az ǵana ýaqyttyń ishinde qoldan-qolǵa kóship júrip, julym-jyrymy shyqqan toz-toz muqabaly kitapqa aınaldy. Qalyń oqyrmannyń júregine jol tapty.
Áýeli sol kóp oqyrmannyń biri retinde tanysyp, kele-kele ómir men óner, zaman men qoǵam, el men jer haqyndaǵy oılarymyz ben pikirlerimiz kisinesip tabysty. Ekeýmiz jıi-jıi jolyǵyp júrdik. Maǵan onyń ádebıet haqyndaǵy oılary, ustanymy, qolyna qalam ustaǵan jurtta sırek bolatyn uıańdyqpen qatar qajetti jerde short keter mineziniń bary unady. Qazaqy ortada týyp-ósken uldyń tuǵyrly qalpy. Orynsyz órekpimeıtin, órekpisi kelgenderdi ornyna qoıa biletin naǵyz azamat-sýretker Jumabaıdyń ómir jolyna, kóz júgirtken adamnyń «Jala men nala», «Jyr jolbarys», «Bizdiń zamannyń Aıaz bıi», «Jańǵyryq» sekildi kesek minezdi kórkem týyndylardyń jaratylysy men tabıǵatyn tanı túseri anyq.
Jumabaı týraly tańǵy saǵat 6.30-da jetken Janarbek inimniń jeke paraqshasyna qaıta-qaıta úńildim. Úńilip otyryp, ártúrli respýblıkalyq basylymdarda basshy bolǵan, ulttyń aqparat keńistiginiń damýyna úlken úles qosqan jyldary jadymda jańǵyrdy. Ásirese, «Qazaq ádebıeti» gazetinde bas redaktor bolǵan kóp jyldyq kezeń júrek tórin aıryqsha qozǵap ótti. Kóńil tórine loqsyp kelip, badanadaı tamshylar tirelgendeı boldy.
Qaıran Jumabaı!
Apyr-aı!..
Aryńa kir juqtyrmaı, armanyńdy aıalap, jazaryńdy arqalap júrip, sen de óttiń be? Asyǵys attanǵanyńdy oılap, qınaldym. Buıryqtyń isi bolar. Tektilik pen bettilikti serik etken seniń qaıtalanbas qalpyń endi óz ortamyzda jetpeı turady. Unatqan adamyńa – ulpadaı jumsaq, unatpaǵanyńa – aq semserdeı ótkir minezińdi izdeıtinder kóp bolady áli. Myna jumaǵy júrekterde únsiz tynyp kúrsingen, tamuǵy alashubarlanyp, qoǵamnyń betine shyqqan daýasy kem zamanda sen sekildi aýzyn ashsa, júregi kóriner jany taza, oıy jomart, qazaqy bolmysy menmundalap turatyn kórkem sózdiń órge salsa, tóske ozar, tańda salsa, keshke ozar bir júırik tulparynyń endi alamandardyń aldynan kórinbeıtini janyma batty. Qabyrǵam qaıysyp, ishim qulazydy.
Baqul bol, baýyrym!
Eliniń týyn bıik ustap, jaryq dúnıeden ótken alash oıly asyldardyń artynan sen de ketip barasyń, Jumash!
Rýhyń peıish tórinde shalqysyn!
Qosh, qazaq kórkemsóziniń aq semseri!
Nurlan ORAZALIN,
Qazaqstan Respýblıkasy Memlekettik syılyǵynyń laýreaty
