Aýyl muǵaliminiń «Altyn tuǵyry»

Bul qoǵam almasyp, jyldap jalaqy alma­ǵan jurttyń kóbi kúnkóristiń q­a­my­tyn myqtap kıgen alasapyran ýa­qyt edi. Jan-jaqtyń bári qýsyrylyp kele jatqandaı seziletin sondaı kezeń qıyn­dyǵyn stýdenttik ómir baıqatpady. Oqý ornyn bastaýysh synyp muǵalimi maman­dyǵy boıynsha bitirip, eńbek jolyn ózi oqy­ǵan № 111 orta mektepten bastady. Kóz­deri jáýdirep otyrǵan top balanyń aldy­na júreksine shyqqany keshe ǵana sııaq­ty edi. Búgin qarap otyrsa, oǵan da 31 jyl bolypty.

Qazirgi bilim salasy ózgeriske toly. Jańa qoǵam muǵalimi osy jańalyqtan qalmaı, zamanaýı ádistemelerdi meńgerýi kerek. Ásirese mektep tabaldyryǵyn jańa attap, jan-jaǵyna úrkekteı qarap otyrǵan shákirtter júregine kilt taýyp, olardyń tanymyn keńeıtýge alǵash qadam jasaıtyn bastaýysh synyp muǵa­lim­de­riniń júgi eki ese aýyr. Osy kúni pedagog-zertteýshi sanatyndaǵy joǵa­ry bilimdi bastaýysh synyp muǵalimi Shuǵy­la Qanıbekqyzy ár salada bir bıikti baǵyndyrǵan oqýshylaryn maqtan etedi.

Ult ustazy Ahmet Baıtursynulynyń «Biz eldi túzeýdi bala oqytý isin túzeýden bastaýymyz kerek» degen támsili ustaz­dyqtyń qaı ýaqytta da aýyr júk arqa­laǵanyn ańǵartady. Memleket bas­shy­synyń bastamasymen salaǵa qol­daý artyp, qala men aýyl mektebi ara­syn­daǵy aıyrmashylyqty azaıtý baǵy­tyn­daǵy bastamalar qolǵa alyndy. Buǵan, árıne, biz qýanamyz. Respýblıkalyq «Aqbota», «Bastaý» olımpıadalarynda, halyqaralyq «Kengýrý», «Ponı» baı­qaý­larynda jeńimpaz atanǵan shákirt­te­ri­mniń jeńisine marqaıamyn. Aýyl mek­tebiniń mártebesin kóterýge sál de bol­sa septigimdi tıgizgenime qýanamyn. Osyn­daı­da eń áýeli meni uly murat jolyn­daǵy ustazdar qatarynan kórgisi kel­gen ákem men anamnyń senim­in aqtaǵanyma shúkirshilik etemin», deıdi ol.

Izdenimpaz pedagog 2021 jyly aýdan­dyq «Úzdik bastaýysh synyptaǵy matematıka pániniń muǵalimi 2021» baıqaýynda júldeli orynnan kórindi. Keler jyly «Bilim berý uıymdaryndaǵy ádistemelik jumys­tardy uıymdastyrýdyń erek­she­­­likteri men múmkindikteri» ta­­q­y­­ry­byndaǵy oblystyq semınarda ma­ra­­pat tórine kóterildi. Sol jyly «Mate­ma­­tıkalyq saýattylyq – oı damytý» ta­qy­rybyndaǵy avtorlyq baǵdarlamasy ja­ryq kórip, «Táýelsizdik tiregim – El­tań­bam eldigim» atty respýblıkalyq baıqaýlar jınaǵyna maqala jarııalady. Respýblıkalyq basylymdarda bas­taýysh synyptarda maqal-mátelder arqyly oqýshynyń til baılyǵyn damytý baǵytyndaǵy maqalalary jaryq kórip júr. Osy jetistikteri úshin ár jyldary aýdandyq, oblystyq kásipodaq komıtetteriniń, aýdandyq bilim bóliminiń marapatyn aldy.

Byltyr kúzde bastaýysh­ synyp mu­ǵalimderine arnalǵan respýblıkalyq «Al­tyn tuǵyr» olımpıadasynyń aýdan­dyq kezeńinde top jardy. Bıyl qańtarda ob­lys­tan da ozyq shyǵyp, respýblıkalyq ke­zeń­ge daıyndaldy. Aqpan aıynda peda­gog­­terdiń kásibı quzyrettiligin arttyrý, mu­ǵa­limniń shyǵarmashylyq áleýetin damytý maq­­satynda Astana qalasynda «Daryn» RǴPO men «Zerdeli» aqyl-oı damytý or­ta­­­lyǵy uıymdastyrǵan respýblıkalyq sa­­­ıysta Shuǵyla Qanıbekqyzy eldiń ár tú­­­k­­­pirinen jınalǵan 160-tan astam árip­te­­si­niń arasynan dara shyǵyp, I oryn ıe­len­di. Baıqaýda bıikten kóringen aýyl mu­ǵa­limine Dýbaıǵa joldama tabys­taldy.

«Olımpıada tapsyrmalary basta­ýysh synyp baǵdarlamalaryn negizge alyp qurastyrylǵan avtorlyq, logıkalyq esepterden turdy. Elimizdiń ár qıyrynan jınalǵan muǵalimdermen básekege túsip, eń joǵary upaı jınadym. «Altyn tuǵyr» – mamandar tájirıbesin ushtap, yntalandyratyn joba. Kásibı daǵdymyzdy jetildirip, básekege qabilettiligin arttyra túsetin saıystan túıgenim kóp. Meniń jeńi­sime senim bildirip, qoldaý tanytqan árip­testerime, aýdandyq bilim bólimine, ózim eńbek etetin № 111 orta mektep ujy­­myna alǵysymdy bildiremin», deıdi Shuǵyla Qanıbekqyzy.

Qyzylorda