Seriktestik áýeli qarapaıym oryndyq jasaýdy qolǵa alǵan. Birneshe túrin. Jep-jeńil, áp-ádemi. Keıin kóztartarlyq etip san alýan oıý-órnekpen áshekeılegen. Sehtaǵy mamandardyń aıtýyna qaraǵanda, aǵashqa jan bitirý úlken qajyr-qaıratty, shydamdylyqty talap etedi. Oryndyqtan bastalǵan ońdy is birte-birte arnasyn keńeıte bastaǵan. Oǵan sebep bolǵan jaıt – tutynýshylardyń tilegi. Zerendi aýylynda osyndaı kásiporynnyń bar ekenin estip, óniminiń óńin kórgennen keıin yqylastary aýsa kerek. Asúı jıhazdaryn jasaýǵa tapsyrys bere bastaǵan. Qazir aıyna shamamen qyryq tekshe metr óńdelgen aǵashtan myńǵa jýyq oryndyq pen 500-ge tarta ústeldi naryqqa shyǵarady.
Bir aıta keterligi, aǵash sehyndaǵy jumystyń 80 paıyzdan astamy avtomattandyrylǵan. Qol eńbegin meılinshe azaıtqannan keıin jumys ta ónimdi. Shıkizatty jonyp, qyrlap, qalypqa keltiretin osy zamanǵy arnaıy qurylǵylar alys-jaqyn shetelderden jetkizilgen. Jalǵyz qurylǵymen 16 buıymdy bir ýaqyttyń ishinde oıý-órnekpen bezendirýge bolady eken. Ilkimdiligine qarap rıza bolasyń. Al buıymdy kórkem etip, jutyndyryp shyǵarý úshin bir táýlikten asa ýaqyt jumsalady.
– Mynandaı stanokpen kez kelgen buıymdy jasaýǵa bolady, – deıdi aǵash sheberi Anatolıı Lıtvınov. – Bizdegi stanoktardyń barlyǵy sý jańa ári osy zamandaǵy aǵash óńdeý salasyndaǵy ozyq nusqalar. Qazir men qazaqtyń ár órnegine mol maǵyna syıǵyzyp, ulttyq uǵymnyń ushqynyn beıneleıtin oıý-órnek qondyrylǵan jınalmaly ústelderdi jasap jatyrmyn. Ábden keýip, kemeline kelgen aǵash kóbelekteı jep-jeńil, yqsham ári myq shegedeı myqty bolady. Mynandaı dóńgelek ústelge jaǵalaı otyrsa, on adam erkin syıyp ketedi. Qonaqjaı halyqtyń dastarqany jınalmaıtyn jaqsy ádeti bar ǵoı. Dóńgelek ústeldiń bir jaqsy jeri kóp oryn almaıdy. Meımanyńdy kútip bolǵan soń yqshamdap jınap, bir qaltarysqa qoıa salasyń. Al jergilikti jurt ústeldiń ústindegi oıý-órnekti kórgen kezde yqylasy aýyp turady. Ústelderdiń kólemi ártúrli. Ony patsha kóńil tutynýshynyń tilegi biledi. Tórt adamdyǵyn da, segiz adamdyǵyn da jasaımyz. Tapsyrys bergennen keıin ári ketse úsh kúnniń ishinde oımaqtaı etip qoldaryna ustatamyz.
Negizi jıhaz jasaýǵa qaraǵaı qoldanylady eken. Seriktestik dırektory Aqmaral Omarovanyń aıtýyna qaraǵanda, bir kezde qurylys materıaldaryn Reseıden jetkizgen. Sibir qaraǵaılary adamnyń qoly jetpeıtindeı jýan bolǵanymen, naǵyz jıhaz jasaýǵa jaramsyzdaý bolyp shyqty. Ishi keýik, borpyldaq. Al Kókshe qaraǵaılary shaqpaq tastaı myqty, berik.
– Qazir eń basty qıyndyq shıkizatta, – deıdi Aqmaral Omarova. – Baǵasy qymbattaǵannan keıin ónimniń ózindik quny da ósip ketedi. Al biz turaqty tutynýshylarymyzdyń kóńilin jyqqymyz kelmeıdi. Jolymyzda kese-kóldeneń jatqan bar másele osyǵan kelip tireledi. Áıtpese, seriktestik sheberleriniń qolynan shyqqan jıhazdar bir sheti Aqtóbe men Qaraǵandy, Astanaǵa deıin belgili bolyp qaldy. Bálkim, bizdiń aldymen sapaǵa kóńil aýdarýymyz septigin tıgizip turǵan shyǵar.
Sál ǵana taratyp aıtatyn bolsaq, jumysyn jolǵa qoıyp, tasy órge domalaı bastaǵan kásiporyn birneshe jumysty biriktirip otyr. Qajetti shıkizatty óńdeýden bastap daıyn ónimdi naryqqa shyǵarǵanǵa deıingi barlyq jumys ataýly osy sehta oryndalady. Jergilikti jerdiń jıhazymen shańyraǵyna shyraı kirgizgen tutynýshylardyń bergen baǵasy, aıtqan lebizine qaraǵanda, sapasy sheteldik ónimderden synyqsúıem joǵary bolmasa, esh kem emes.
Aralap kórdik. Jumysy kóńil toǵaıtar kásiporyn bes sehtan turady eken. Oń qanattaǵy bireýinde shıkizat óńdelip, birshama pishindelip, qalypqa keltirilse, ekinshisinde kóz jaýyn alatyn kórikti oıý-órnekpen árlenedi. Kelesi sehta daıyn buıym súrgilenip, arnaıy sapaly boıaýmen syrlanady. Ázirge munda onnan astam adam jumys istep, turaqty tabys taýyp otyr. Kásiporynnyń elge jaqqan tusy da osy.
Aqmola oblysy,
Zerendi aýdany
